日本固然係一個令人心往神儀嘅好國家，但無可否認嘅係，日本亦同時有唔少「變態」、「痴漢」，對女性構成一定程度嘅威脅。好似近日日本神戶就有一名偷拍犯人被捕，令人震驚嘅，係今次除咗係佢10年內第三次因為同類案件被捕之外，佢三次嘅犯案手法亦如出一轍，就係捐入去水渠中，透過渠蓋向上偷拍女生嘅裙底。

據《MBS新聞資訊》及《Share News Japan》等日本媒體報導，近日兵庫縣警方接報，指區內某個去水渠下發現一部開住錄影模式嘅電話，懷疑有人嘗試偷拍女生裙下春光。警方到場後除咗搵到部電話，更於距離部電話大約100米嘅去水渠內，發現咗一名36歲、來自神戶嘅男人「平井泰臣」，懷疑佢就係偷拍犯人並將佢拘捕。

2013年新聞報導

近日新聞報導

事後調查得知，原來呢個「平井泰臣」乃係偷拍慣犯，早於2013及2015年時就已經因為同類型犯案而被捕，而且上次兩次犯案嘅手法更為誇張。睇返2015年時嘅新聞報導，當時「平井泰臣」親身捐入去水渠後，係直接仰臥於去水渠蓋之下，親眼睇住上面嘅人來來往往。但由於日本去水渠設計並唔深，而且通常都幾乾淨，所以佢好快就被行人識破而被捕。

當年嘅報導亦指出，10年前「平井泰臣」偶然望到地上嘅渠蓋，咁啱又有幾位日本女學經過，於是「靈機一觸」諗到呢個作案手法。同時亦有指佢當年被捕時，曾經講出：「如果有來生，我希望成為道路」嘅「名言」。

資料來源：Share News Japan