如果大家有留意日本嘅社會新聞，或者都會知道近年東京大久保公園附近一到晚上，就會有大量「賣春」女生站於街頭招攬客人，情況已經嚴重到日本傳媒多次進行專題報導。而近日日本傳媒再次製作相關報導，甚至搵到賣春女子嘅媽媽上鏡講述女兒淪落嘅過程，但節目出街之後， 大量網民竟然將問題歸咎於媽媽當年安排女兒入讀女校！

話說日本富士電視台節目《めざまし8》上週播出關於目前大久保公園附近賣春女子嘅報導。節目中搵黎幫助該批女性嘅義工團體，並揭示雖然部份女性的確係因為疫情、戰爭等原因拖累經濟，無法維生所以走上賣身嘅道路；但其實另一部份女性係因為沉迷牛郎欠上巨債，「下海」係為咗賺錢還債。義工團體發言人表示，有女性每個星期就會增加高達300萬Yen (約HK$15.6萬) 嘅債務情況相當嚴重。

節目亦訪問到一位向義工團體求助嘅媽媽。據媽媽憶述，佢「從小呵護，畀佢讀女子中學、大學」嘅寶貝女兒早前透過交友軟體中認識一名男子並開始交往，結果真係見面時先發現對方於牛郎店工作，但女兒表示「不能歧視對方的工作」，於是繼續與牛郎交往 (幫襯)，最後欠下近千萬Yen巨債，唯有於大久保公園賣春還錢。但更驚人嘅係，據媽媽指女兒半年前開始賣春，賺嘅錢已經有幾百萬Yen，但債務就幾乎無變，換言之女兒係一邊賣春賺錢，一邊繼續幫襯牛郎。 

女子高女子大で大切に育ててきた娘が社会に出た瞬間にホストに捕食されて風俗に沈められた親辛いな

こればっかりは各家庭で社会に出る前に防御法を学ばせるしか… pic.twitter.com/rm8qOPIF6w

— ゆるふわ怪電波☆埼玉 (@yuruhuwa_kdenpa) October 23, 2023

節目原意應該係想向日本大眾揭示大久保公園賣春女性嘅狀況，但出街後網民反而將矛頭指向該名受訪媽媽，並指佢當年將女兒按排入女子中學、大學就係導致目前事態嘅主因。網民們指出從小進入女校就會缺乏與男性接觸嘅經驗，到出社會後突然接觸到危險嘅花花世界就好容易走偏。網民亦指其實讀男校亦有同樣問題，唔少男校生、或者學校女性比率非常低嘅男學生，出社會之後一係沉迷風俗店、陪酒店，一係就成為偶像狂粉，甚至有人高呼應該要廢除所有男、女校。但亦有人指出，雖然報導中女兒讀女校的確係問題原因之一，但個牛郎先應該要負上最大責任。