{ SKIP }
文:MenClub 魏文青  
POSTED ON 30 Oct 2023

近年Disney推出真人版「公主電影」幾乎都於一片罵聲中上畫落畫,而原定明年3月24日上映、由Rachal Zegler主演嘅真人版《白雪公主》亦唔例外,尤其當早前有傳媒影到拍攝實照,推斷Disney打算以「七隻魔法生物」取代原作「七個小矮人」之後,「政治正確」嘅罵聲更係衝天而起。不過,睇黎大家鬧得有用!因為近日Disney公佈嘅《白雪公主》首張劇照中,七個「小」矮人就驚喜回歸!

話說因為荷里活演員罷工持續,近來一眾片商都開始調整未來一兩年嘅電影上映日程。而據《The Hollywood Reporter》報導,Disney就打算將原定明年3月24日上映嘅《白雪公主》推遲到2025年3月21日。或者係因為延遲上映想補償Fans,又或單純想延續討論熱度,Disney於同一日就公佈《白雪公主》自宣佈開拍以來首張官方劇照 (之前有嘅都係外國傳媒喺片場影嘅)。

劇照中可以見到由Rachel Zegler飾演、雖然唔「白」但造型頗為對辦嘅白雪公主坐於畫面正中,而圍繞佢身邊嘅,就係七個唔「小」,但的確比正常人「矮」、而且同原作動畫造型頗為相似嘅「小矮人」。似乎就係證實咗真人版《白雪公主》會保留「小矮人」設定。

由於早前有傳Disney會用「七隻魔法生物」取代佢哋覺得政治不正確嘅「七個小矮人」,仲有傳媒於片場影到「七隻魔法生物」嘅造型,所以今次呢張劇照一出,唔少人都非常驚訝「七個小矮人」竟然會「回歸」。目前Diseny並無對「七個小矮人」嘅出現作出任何解釋,但有網民猜測係因為「七隻魔法生物」被人鬧得太甘,所以Disney「從善如流」換返「小矮人」上陣。

但「小矮人回歸」並唔係只有一片讚好。首先就係因為今次公佈嘅劇照唔知點解有啲低清,喺畫面「起渣」嘅情況下,網民紛紛嘲笑七個小矮人睇落非常詭異,甚至已經有人製作出不少「meme圖」。另外畫面中心白雪公主同其中五個小矮人嘅位置,都令人想起某張著名「一女五男」圖,同樣引來網民取笑。唔知各位對於「七個小矮人」回歸又有咩睇法呢?

資料來源:The Hollywood Reporter

由Christopher Nolan執導嘅史詩鉅作《The Odyssey(奧德賽)》仲有一年左右先上映,但首部預告片日前已聯同《Jurassic World: Rebirth(侏羅紀世界:重生)》喺北美戲院一齊播出。不過,有觀眾就偷錄咗影片,並上傳 ...
hobby
【影視】Nolan新作《The Odyssey》首部預告已在戲院播出 內容隨即被盜錄公開到網上
03 Jul 2025
HBO劇集《The Last of Us(最後生還者)》編導兼Naughty Dog總裁Neil Druckmann宣布,佢將會退出第三季劇集製作,專心開發工作室旗下新作《Intergalactic: The Heretic Prophet(星際:異端先知)》。 《Interg ...
hobby
【影視】Neil Druckmann宣布退出《最後生還者》劇集創作 專注開發新遊戲《星際:異端先知》
03 Jul 2025