前AV女優蒼井空早年結婚並於2019年生下一對雙胞胎。近日佢接受日本Abema TV嘅訪問，分享佢呢幾年做全職媽媽嘅經歷，並談到過去嘅女優身份對於育兒嘅影響。當中佢就正面回應有網民指「媽媽是AV女優的話孩子好可憐」、「孩子們將來一定得不到幸福」等說話，並指出「幸不幸福係由孩子們自己決定」。結果，當然就係引起另一波討論。

蒼井空日前接受Abema TV嘅獨家訪問，分享佢近年成為全職媽媽嘅生活。而訪問中嘅一大重點，就係佢作為前AV女優嘅身份以及對小朋友嘅影響。蒼井空表示雖然身邊不停有人話「其他人一定會發現 (你曾經係AV女優)」，但到目前為止佢都覺得其他人並不知情。而佢對於自己嘅過往亦相當大方，甚至小朋友嘅幼稚園文件要填上自己職業時，佢都係直接回答，認為就算職員們見到都只會係「呀~原來係咁」嘅反應。而如果有其他家長覺得佢唔應該與其他小朋友接觸，佢亦冇咩所謂。

佢亦表示，由於兩個小朋友目前只係4歲，佢亦冇特登提起過自己嘅身份，所以小朋友到目前都應該唔知道佢嘅過去。但佢相信到小朋友長大、識自己上網搜尋時，就會知道媽媽究竟係咩人。而如果小朋友直接黎問，佢亦會直接承認，並詢問小朋友是否被其他人欺凌。

蒼井空亦於訪問中正面回應「媽媽係AV女優好可憐」一說，佢表示「未來可唔可憐」只有小朋友自己能夠決定。而呢種因父母身份而被欺凌嘅事亦不僅限於AV女優，明星、運動員、公眾人物嘅子女都會遇到，佢亦唔會係唯一一個。

▼蒼井そらさんのインタビュー動画(約11分)https://t.co/7ALUefXfbn

▼アンケート
母親がAV女優である子どもは…

— 滝沢ガレソ???? (@takigare3) November 14, 2023

因為蒼井空提到「未來可唔可憐只有小朋友自己決定」，所以訪問出街後又引起網民熱烈討論，而個討論本質其實都仲係「可唔可憐」。有人認為小朋友未來一定會遇到其他人拎住媽媽嘅AV或者裸照黎取笑，又或被排擠。亦有人認為唔係「媽媽係AV女優」令小朋友不幸福，而係利用呢件事黎取笑嘅人令小朋友不幸福。亦有人指出，「媽媽係個AV女優」同「媽媽係個著名嘅AV女優」已經有好大分別，「媽媽有錢的話一定幸福」。

日本著名八卦情報X (Twitter) 用家「滝沢ガレソ@takigare3」就舉行咗個「媽媽是AV女優，小朋友會不會不幸」嘅票選，並吸引到超過22萬名網民參加。當中有53.5%網民表示「小朋友並不可憐」，其中有37.4%為男性網民，16.2%為女性網民。值得一提嘅係，男性普遍認為「不是不幸」 (37.4% v.s. 24.3%)，但女性網民就普遍認為「是不幸」(22.1% v.s. 16.2%)。

資料來源：Model Press、Abema