如果大家記性好，或者會記得十幾年前，香港環保署有個助理署長因為返工有一半時間都用黎上「鹹網」而被紀律處分。而近日日本橫浜市政府亦發生咗一件類似嘅事，但唔同嘅係呢位職員唔係上鹹網，而係玩接龍，而且佢連收工甚至放假都要返去繼續玩，真係分唔出佢究竟係偷懶定好勤力。

據日本傳媒報導，某位現年51歲、於橫浜市政府環境創造局總務部工作嘅「係長」，近日被發現於2023年1月至5月期間嘅81日內，總共用咗64個鐘、用公司部電腦玩接龍同睇旅遊網站。數口精嘅你可能即刻計到，81日內玩咗64個鐘接龍，即係平均一日玩40分鐘左右，睇落好似都幾多呀可？但根據當地政府公佈嘅數字，嗰64個鐘接龍入面，其實只有7個鐘35分鐘係發生於辦公時間內，其餘56個鐘30分鐘係發生於辦公時間外。甚至嗰81日入面，有11日直頭係假期黎，換言之呢個「係長」唔知做咩放工唔返屋企、放假又走返公司，就係為咗玩接龍。

不過，其實呢名「係長」都算係慣犯黎。2022年12月佢就曾經因為被捉到用公司電腦做私人嘢而被扣薪，所以今次嘅「接龍事件」其實係「再犯」。加上佢亦被捉到於2023年4月至6月間，未得上司許可離開工作崗位9個鐘30分鐘——據呀「係長」講，佢係為咗唔畀自己玩接龍，所以於大樓內上上落落，拉下筋咁——所以最終佢就被罰停職兩個月。

資料來源：kanaloco