對大部份女性（以及部份男性）而言，要Post有自己個樣嘅相之前要P一P，已經係接近身體反應嘅自然動作。但大家又有冇諗過，點解人P圖、我P圖，人哋硬係P得特別誇張特別假咁樣嘅呢？近來一個日本研究就發現，其實唔一定係人哋嘅P圖技術或者審美觀有問題，更有可能係因為我哋特別接受到自己P圖後個樣。

來自大阪大學嘅「中野珠実」教授早前做咗個研究，先將受訪者本人嘅照片，以及某位陌生人嘅照片變成兩組分別8張「P圖等級」不同嘅照片，然後要求受訪者於兩組照片中選出佢覺得最好睇嘅一張。結果發現，受訪者於揀選自己照片時，P圖平均等級係4.25，但揀人哋嘅照片時，平均等級則下跌到3.53。換言之受訪者面對自己個樣時，對於P圖嘅寬容度更高。

中野教授表示，當大家見到自己P圖後嘅靚樣，腦內就會分泌「快樂激素」多巴胺，形成一個獎勵機制，於是會傾向越P越勁，以獲得更多「獎勵」；但睇人哋嘅P圖照時，腦內就唔會有同樣反應，所以相對地會更為保守。

中國著名「蛇精女」李蒽熙及「蛇精男」劉梓晨

有趣嘅係，當有媒體拎住個研究結果去訪問日本路人時，有女性受訪者表示自己P圖覺得好滿足、覺得自己好可愛，但人哋嘅P圖就「不符合我嘅價值觀」所以唔可愛；而有男性受訪者就表示「啲人P到自己塊臉三角形，佢哋唔覺得恐怖架咩？」

中野教授亦表示，人之所以會P圖，其實同化妝一樣，都係想透過非語言性嘅溝通，向其他留下一個儘量好嘅印象。而P圖雖然會帶來快樂嘅感覺，但當佢哋見到自己個真樣時，反而會因為落差太大而唔開心。另外佢亦提到，過度嘅P圖會令到其他人無法從觀看面部獲得有用嘅資訊，例如你嘅心理狀態或者真實樣貌，某程度上會將塊面嘅「價值」降低。

資料來源：Abema Times