眾所週知，女性會將人生得高，個樣令你…I mean個膊闊到令你羨慕嘅男性視為更吸引、更強壯、戰鬥力更強嘅對象，而呢啲特質又係擁有良好基因以及提供資源能力嘅表徵，再繼而影響女性嘅擇偶行為。而近日一個研究就試圖了解生存環境，以及女性個體分別如何影響呢種擇偶行為，結果就發現當中最重要嘅變量，原來係女性覺得自己有幾吸引。

來自美國Texas A&M國際大學嘅Ray Garza及其團隊，早前於科學期刊《Evolutionary Psychological Science》公佈咗最新研究。研究中佢哋先準備咗大量不同高度及肩臀比嘅男士照片，並要求247位平均年齡為24.5歲嘅異性戀女性為呢啲照片嘅吸引力、強壯度、戰鬥力等評分。每位女士亦會隨機收到一個「環境設定」，例如係「安全」、「資源缺乏」、「暴力」等，以得知環境因素如何影響女性嘅擇偶行為。

研究結果首先再次印證高大男士更吸引。整體而言，越高、肩臀比越大（即係膊頭越闊）嘅男士，其吸引力、強壯度及戰鬥力評分都會越高。但有趣嘅係，研究團隊搵唔到環境設定與男士評分之間有任何顯著性嘅關連。換言之無論係處於安全環境，定係高大真係會帶來明顯優勢嘅艱難環境之中，女性都係偏好高大嘅男性。同時女性偏好長期或短期關係，亦與佢哋對男性嘅評分無關。

咁咩先有關呢？原來研究團隊仲要求每位女士為自己嘅吸引力評分，結果就發現覺得自己越吸引嘅女性，對高大男士嘅評分就越高，換言之相信自己好正嘅女性，會對擇偶對象有更高嘅標準，所以更偏好高大男性。Ray Garza表示：「女性自覺嘅配偶價值，會加強佢哋對高大男士嘅偏好，可以認為佢哋有更高嘅能力去同其他女性競爭展現出理想特質嘅男性。」

資料來源：Examining Ecological Harshness, Sociosexuality, and Mate Value in Women’s Preferences for Men’s Height and Shoulder-to-Hip Ratio