根據進化論，生物個體為咗將自己嘅基因儘可能地傳承落去，就會與同物種其他同性競爭繁殖嘅權利。而即使人類作為地球上行為最複雜嘅物種（大概沒有之一），亦逃唔出呢種同性競爭嘅制約。而根據一個最新研究，為咗抵消身材好嘅女性於同性競爭之中嘅優勢，女性更傾向貶損上圍豐滿嘅女性，而且佢哋只睇大小，不論「挺墮」。

田野憂

由於過往關於同性競爭嘅研究，都聚焦於男性之間嘅競爭，所以來自美國德州A&M國際大學嘅Ray Garza博士，早前就做咗個關於女性同性競爭嘅研究黎填補學術空白。而佢哋想研究嘅主題，就係女性嘅胸部大小及胸型（係男性潛意識中得知女性生育能力嘅指標）如何影響女性之間嘅同性競爭。

為此佢哋先準備咗12張由A至D罩杯、不同堅挺程度（或者反過黎講，「墮」嘅程度）嘅女性上身圖，並利用修圖技術確保圖中嘅胸部有統一嘅分離程度（即係俗稱嘅「八字波」），再於學校招募114名平均年齡為24歲、主要為西班牙裔嘅異性戀女學生。受訪者睇完啲相後，要紀錄低佢哋對圖中女性作出直接語言攻擊（例如呼喝）或間接語言攻擊（例如背後講人壞話）嘅可能性。從而令研究團隊得知女性對於不同胸部大小嘅女性嘅行為變化。

ちとせよしの

結果，不出所料地，D罩杯嘅女性係最容易遭受女性嘅攻擊，C罩杯緊隨其後，而A及B罩杯受到攻擊嘅機會就低得多。值得留意嘅係，女性攻擊上圍豐滿女性時，似乎係唔睇形狀嘅，因為不同胸部堅挺程度對結果冇影響；同一時間，受訪者本身有幾傾向與女性競爭男性，亦對研究結果冇影響。換言之唔理女人本身有冇需要、意願去競爭男性，只要見到個大胸女人，佢哋就會更傾向作出攻擊。

研究團隊指出今次結果符合進化論，亦即女性本身都視上圍豐滿嘅女性更能吸引男性，所以係競爭繁殖機會時嘅大敵，繼而向對方作出攻擊以貶低對方嘅吸引力及社會地位。

資料來源：The Role of Breast Morphology in Women’s Rival Derogation Tactics