相信大家身邊都有唔少人選擇單身，當中原因好可能係現代實在有太多愛情嘅替代品，但另一個原因就係越黎越多人覺得約會、拍拖太貴太花時間。咁究竟現代人約會究竟有幾貴呢？近日多間美國媒體就分別整理多個調查嘅結果，發現現代人出去約會嘅金錢成本高得驚人。

圖片：ImageFX

據《Newsweek》報導，一個約有2000人參加嘅研究發現，美囸成年人每次出去約會平均願意花125.6美金，即約HK$980左右。而《New York Times》則引用成人玩具品牌Lelo與OnePoll合作嘅調查，指出一個美國成年人每年外出約會16次，每次平均189美金，即係一年總共花花3,025.12美金（約HK$2.35萬）於約會之上。

兩萬幾銀對於大部份人都唔係一筆小數目，對於啱啱畢業、收入較低嘅Z世化年輕人黎講負擔就更加重。事實上調查亦發現有46%Z世代年輕人認為約會花費對佢哋黎講有壓力。

圖片：ImageFX

而如果你係男人，呢個壓力就可能更大。因為同一個調查發現，於所有約會當中，只有27%係用AA制、或者「你一餐我一餐」等嘅方式由二人共同承擔，而由男士全數埋單嘅佔比就高達54%，反觀由女性出錢嘅就只有12%，換言之絕大部份約會支出都落於男性嘅肩膀上。

針對此現象，《New York Times》亦尋求關係治療師Aly Bullock嘅意見。Aly則指花太多錢，會有如「愛情轟炸」（Love-bombing），亦即透過過度關注和奉承對方，令對方產生依賴感，令雙方對於關係產生不切實際嘅期望，你會覺得自己付出好多需要回報、對方又會覺得你付出係應份嘅。但使得太少錢，又會令對方認為你唔重視約會。所以簡單黎講就係量力以為——唔單止係財力，仲要視乎你對於段關係嘅期望，從而決定你究竟要花幾多錢於約會之上。

資料來源：Newsweek、New York Times