剛剛刷新Rolex拍賣成交價的Ref. 6062 'Bao Dai'，來自兩日前舉行的Phillips Geneva Watch Auction: Five，一隻1952年產的18K金撈，從2.5M瑞郎競投至5M，計返港紙差不多成4千萬；咁貴全因隻腕錶別具歷史意義，其擁有者為越南的末代皇帝，年號「Bao Dai」。其實早於2002年的日內瓦拍賣會中，呢隻Ref. 6062 'Bao Dai' 已經憑US$235,000美元成為當年最貴的Rolex拍賣品，15年後嘅今日，升值足足21倍有多！

要知道點解咁誇張，就要睇下佢當年嗰位主人 —越南阮朝13任君主，亦係末代皇帝Nguyễn Phúc Vĩnh Thụy阮福永瑞，又名阮福睓；9歲被封為東宮太子，且被送到巴黎接受西方教育薰陶，12歲返國於順化登基，稱安南國王，改年號「保大」，所以又稱之為「保大帝」。

有讀歷史都知道，少主年幼登基，事必後宮干政，做一輪傀儡皇帝，但幸運的是，保大帝最後仍能全身而退 : 1932年親政，1945年退位，流亡之時亦嚟過香港，最後97年於巴黎病逝，享年84歲。

呢隻黃金黑面鑽石Rolex，據聞是保大帝於1954年在日內瓦購買的，而同版本的Ref. 6062其實共有3隻，見到如此拍賣佳績，相信剩下兩隻，若果仍然在生的話，很快便會現身。

1952年產，直徑36mm的18K黃金錶殼，黑面錶盤配黃金指針，5個鑽石indexes盤踞於12、2、4、8、10點位置，比較得意的是由於12點位有鑽石，Rolex標誌被稍移向下。中間的「Officially Certified Chronometer」應被移除，下方換上一個月相顯示，腕錶搭載一隻自家Perpetual，cal. 9 3/4'''自動上鏈機芯。

Source : Phillips