日前著名腕錶新聞網站報導Rolex、Tudor、Patek Philippe、Chanel及Chopard發表聯合聲明，將會退出原定4月尾舉行，後來因武漢肺炎疫情而宣佈延期至2021年1月嘅Baselworld錶展，堪稱錶壇震撼彈。時隔一日，Baselworld亦發出聲明回應 (話係反擊又得)，究竟兩邊發生咩事呢？

卻說4月14日，Rolex對外發出聲明，指將會與上述另外四大品牌一同退出Baselworld 2021，並「轉投」另一錶展「Watch & Wonders (前身為SIHH)」嘅主辦方FHH，並於2021年4月在日內瓦舉行全新、目前連名都未有嘅新錶展，並歡迎其他錶廠參與。至於退出嘅理由，聲明上就話係「Baselworld管理層一系列嘅單方面決定」，包括將展期延至2021年1月，以及「未能滿足品牌嘅需要及期望」。

更值得一提係較早時間，Rolex嘅首席投資長已經出咗封公開信，要求Baselworld退回2020年展(即係原定4月尾舉行嗰個)嘅相關費用，並講到明「否則，我們恐怕會是Baselworld的完結」。Rolex CEO Jean-Frederic Dufour亦指出新展會與「有相同信念，並對瑞士腕錶業有無窮支持嘅伙伴」合辦，希望以「更符合我們期望與需要嘅方法展示腕錶，更好地保障業界利益。」

照咁睇，Baselworld就係做哂衰人，而且五大品牌離去亦可以話係斷咗Baselworld嘅命脈。但如果你睇Baselworld今日發出嘅聲明，似乎當中又別有內情。整篇聲明最重要嘅訊息，係Baselworld指延期至2021年1月嘅決定，係與包括Rolex等多個錶廠，多次商討並獲得正面回應後作出。而錶廠有意轉戰日內瓦嘅消息亦從未於任何會議中提出，聲明更直指Rolex等退出錶廠早有預謀，而啲咩退款呀盛呀只係名義上嘅理由。

咁實際理由又會係啲咩？留意返Rolex講明新展會針對「零售商、媒體及VIP客戶」亦即Baselworld傳統上嘅主要參加者，而Baselworld近年就積極開拓大眾消費者客群，或者呢個分歧先係大家分開嘅主要原因。

講到尾，依家就係進入「錶廠話Baselworld對我唔好」、「Baselworld話錶廠起我尾注」嘅口同鼻拗階段。再加上Rolex等品牌早前亦宣佈會將新錶延期至今年年尾甚至下年年頭先發佈，即係如無意外，今年錶界應該冇咩錶講啦。