講起腕錶，大部份人都會諗起啲大牌子，但世界上仲有唔少獨立製錶品牌值得大家留意。例如創立1828年嘅「H.MOSER & CIE」就係其中之一。「H.MOSER & CIE」由Heinrich Moser先生於瑞士創立，曾一度賣篇歐洲，而Moser先生亦曾受邀遠赴俄羅斯為當時嘅沙皇修理鐘錶，品牌隨後幾經轉手，到上世紀70年代慢慢末落，到2005年由Moser先生嘅外曾孫Roger Nicolas Balsiger重新創立，至今都係以家族經營模式經營自家製錶廠。

品牌於一月推出以二、三十年代最早期嘅高速火車線條為靈感嘅Streamliner系列，40mm枕型錶殼加上光澤柔潤嘅一體式鋼錶帶令其外表充滿流動感，首作飛返計時深獲收藏者歡迎。而新作Streamliner大三針就換上辨識度非常高嘅煙燻綠(Matrix Green)錶盤，配自家製HMC 200自動上鍊機芯，搭載黃金擺陀，三日動力儲存。