又到年尾，雖然睇個勢都估到應該冇咩可能一大班人出街玩，但相信大家聖誕、除夕都會搵個地方同班朋友慶祝。不過除咗慶幸自己又過一年之外，你有冇諗住為你哋嘅聚會增添幾分意義？由The Bottle Shop發起嘅「好啤企画」，除咗整咗兩款非常有本地特色嘅手工啤出黎之外，大家幫襯更加係做緊善事！

好啤企画嘅英名係「#DrinkForGood」，簡單啲黎講，就係只要你幫襯呢個企画下嘅特製手工啤，當中有部份收益會捐畀本地慈善團隊。例如成份有「愛心」嘅「Captain Wonder 奇隊長」，其收益就會捐畀主力協助貧困弱勢兒童嘅「香港兒童慈善基金協會」；而成份中冇叉燒嘅「叉燒俠」，其收益就會捐畀主力舒緩貧窮、減少食物浪費嘅樂餉社。

如果有興趣支持一下，大家就可以去如Beer Pro、Kappening等有售本地手工啤嘅餐廳及酒吧，又或者直上The Bottle Shop網站買返屋企飲，咁喺慶祝節日嘅同時，又可以為弱勢社群出一分力。