Rolex腕錶供不應求都唔係新聞，加上疫情導致工廠一度停工，令貨源短缺問題雪上加霜，經銷商現貨少之又少，熱門錶款更加要「排隊」、「食骨」先有機會買得到。早前「Yahoo! Finance」記者Pras Subramanian就邀請到多位業界人士探討有關現象，最後竟然聯絡到Rolex罕有地出面回應。

Rolex針對Yahoo! Finance嘅討論發聲明回應：

「產品短缺並唔係我哋嘅行銷策略。我哋目前嘅產量無辦法徹底滿足現有市場需求，至少喺唔降低產品質素嘅情況下只能夠咁做，而且我哋都唔會為咗增產而降低產品質素。傑出嘅工藝水平需要時間醞釀，我哋會繼續花費必要嘅時間確保所有腕錶符合公司卓越標準，同時喺質素、可靠性以及耐用性方面達至客戶期望，Rolex生產頂尖腕錶嘅過程絕不妥協。

所有Rolex腕錶都係由位於瑞士嘅4間工廠開發及生產，並由手工組裝而成，以保持Rolex喺品質、性能、美學方面達到一貫高水準，咁做自不然會限制咗我哋嘅產能，不過我哋會喺保持產品質素嘅前提下，盡可能提升產量。

最後大家需要留意，Rolex腕錶只會喺官方經銷商獨家販售，而呢啲經銷商擁有獨立管理、分配腕錶畀客人嘅權利。」

從聲明可以見到，Rolex聲稱自己並唔係「飢餓行銷」，為咗保持產品質素所以無辦法提升產量。而佢最後強調經銷商有權選擇將腕錶賣畀邊個，似乎暗示緊「有人炒我都唔想㗎！」，將個波推咗落經銷商到，唔知大家又有咩睇法呢？