軍事風格精品之所以深受男士歡迎，莫過於嗰種硬朗、剛強又型格嘅元素，如果你都鍾意軍事風嘅話，近日Tudor最新推出嘅新款潛水錶Pelagos FXD，或者會啱你心水。

早於50年代Tudor推出首批現代專業潛水腕錶，就一直為法國海軍提供長期供應直至80年代，期間更獲得「法國海軍官方供應商」稱號。事隔多年雙方再度聯手，並搵嚟法國海軍特種部隊（Commando Hubert）合作，推出全新Pelagos FXD潛水腕錶。

外觀計設方面，Tudor從法國海軍過往使用過嘅Tudor潛水錶汲取靈感，錶面及陶瓷錶圈都用上具代表性嘅海軍藍色，搭配方形鏡點標記以及「雪花」指針，並塗上高性能X1級瑞士Super-LumiNova夜光塗層，確保在任何環境下都清晰易讀。經磨砂處理，呈現啞面效果嘅42mm鈦金屬錶殼，能夠減少光線折射並可提供200米防水深度。順帶一偉，Pelagos FXD當中嘅「FXD」係指錶殼上格外堅硬嘅固定式錶帶杆，能為潛水員提供可靠嘅保障。

同時為咗承繼傳統，今次錶蓋亦刻上法國海軍（Marine Nationale）標誌以及「M.N.21」（Marine Nationale 2021 縮寫）。

另外，Pelagos FXD內部搭載Tudor自家製MT5602自動上鏈機芯，並通過瑞士官方天文台認證（COSC），動力儲備達70小時。除咗本身會有一條藍色織紋NATO錶帶之外，再會附送多一條藍色橡膠錶帶，等用家可以因唔同使用情況而隨意取換。

目前Tudor Pelagos FXD已正式上架，定價為HKD$29,200，有興趣嘅朋友不妨留意一下。