雖然Leica主要生產高端相機及運動光學產品，但曾經就喺2018年跨足腕錶界發表自家機械腕錶「Leica L1」及「Leica L2」，經歷近4年嘅精工細作，如今終於投入量產正式上市。

兩款腕錶外觀均由設計過多款Leica相機嘅Achim Heine教授操刀，將Leica嘅設計美學巧妙融入其中，弧形錶盤玻璃以及錶冠上嘅特殊凹槽都令人不禁聯想到Leica鏡頭。並聯同德國製造商Lehmann Präzision GmbH合作研發及設計，而且大部份零件都係由德國黑森林地區嘅Lehmann factory生產，貫徹「德國製造」精神。

Leica L1及L2同樣採用41mm不鏽鋼錶殼，藍寶石水晶玻璃鏡面及後蓋，並且具備專利按壓式錶冠，只需按下錶冠即可進入時間調校模式，而非一般腕錶所用嘅拉出錶冠設計。兩者於外觀上大同小異，不過L2就有GMT雙時區及晝夜顯示功能，所以四點鐘位置比L1多出一個錶冠。

目前兩款腕錶已於指定專門店開賣，由於產量極少，亞洲地區只得上海、新加坡及東京銀座專門店有售，售價分別為1萬美元（L1）及1.4萬美元（L2），即大約7.8萬及10.9萬港幣。