自2020年開始，Netflix上就有一套日、美合製嘅《攻殻機動隊》動畫《攻殻機動隊：SAC_2045》，而動畫第二季亦於去年5月已經於Netflix上線。不過整合第二季動畫嘅劇場版，就要等到黎11月23日先於日本上映，而為咗宣傳，官方就宣佈與CITIZEN合作，推出以CITIZEN著名嘅「ANA-DIGI TEMP」腕錶為藍本嘅兩款聯乘腕錶。

1982年時，CITIZEN推出集指針顯示 (Analog)、電子顯示 (Digital)及溫度計測 (Temperature) 於一身嘅「ANA-DIGI TEMP」腕錶，由於充滿未來感而大受歡迎，去到近年更成為「復古未來風」嘅標誌配件之一，與同樣來自80年代嘅《攻殻機動隊》可謂天作之合。

是次聯乘嘅兩款腕錶型號分別為JG2155-61L以及JG2155-61W，兩者整體造型及佈局都於普通「ANA-DIGI TEMP」差別不大，最主要的改動在於錶面由以往的黑色，改成藍色及綠色電路板。而左下方的溫度感應亦換成動畫中「公安九課」的三角型標誌，旁邊原本寫上「ANA-DIGI TEMP」的位置，則改為寫上「攻殻機動隊」。另外兩款腕錶的底蓋亦有不同設計。

據CITIZEN官網顯示，兩款腕錶都將會以預約生產方式發售，而預約期就要到明年6月下旬先開始，7月上旬結束，換而之大家就算想買要等近一年時間先有得落單。售價方面則為49,500Yen (約HK$2,575)。除咗隻錶本身外，仲附送動畫主角草薙素子嘅小型塑膠半身立牌。

資料來源：CITIZEN