排名不分先後，不過第一枝講佢因為我認為佢係最好飲嘅12年Single Malt。呢支威士忌由The Balvenie釀製，酒液先後經過傳統橡木桶同歐洲雪莉桶嘅熟成，所以兼具兩種酒桶嘅風味同特性。

The Balvenie 嘅威士忌都有種標誌性嘅蜂蜜香甜，12年呢枝作品就更明顯。酒香係豐富嘅水果、加上 Oloroso 雪莉桶嘅濃郁氣息，撲鼻嘅香氣瀰漫雲尼拿同蜂蜜嘅香甜。酒體非常順滑，堅果、玉桂、形成迷人嘅層次，餘韻悠長而豐盈。

The Glenfiddich 12年單一純麥威士忌

世上得獎最多嘅其中一枝12年，多年嚟累積嘅口碑絕對唔講得笑。Glenfiddich 12 係領導Single Malt潮流嘅優秀作品，佢啲綠色三角型瓶身設計，一睇就令人想起佢嘅啤梨果香，入口嘅時候溫潤而甘甜，美國橡木桶同歐洲雪莉桶調和得恰到好處，餘韻悠久清新。

Macallan Fine Oak 12年 Triple Cask Matured

呢枝係困難嘅選擇，因為Macallan12年仲有支唔錯嘅Sherry Oak，還有舊版Fine Oak，不過我最後都係覺得Fine Oak Triple Cask Matured嘅變化同埋層次會稍勝一籌。Fine Oak相比起Sherry Oak，風味一定係比較輕柔高雅，需要飲家們花更多時間細心欣賞。Fine Oak所用嘅橡木桶分別有3種 : 歐洲雪莉桶、美國雪莉桶、美國波本橡木桶，呢個組合被命名為 「Triple Cask Matured」。

經過調整後嘅Fine Oak，歐洲雪莉桶嘅部份明顯地加強咗，黑朱古力、焦糖、拖肥糖嘅色彩更為濃厚，而本身美國波本桶所帶嚟嘅椰子、雲尼拿、奶油香甜亦唔會太過搶鏡，呢啲咪係平衡同層次所在囉。

The Singleton of Glen Ord 12 年單一純麥威士忌

台灣街頭巷尾都見到The Singleton嘅廣告，呢隻威士忌品牌於當地甚至可以同Macallan分庭抗禮，極之受歡迎。The Singleton 12年全面演繹咗蘇格蘭威士忌嘅傳統面貌，堅持使用當地生產嘅大麥，緩慢嘅冷發酵方式，Small Batch 生產模式，令呢枝12年相當全面。酒香呈現豐富嘅水果果香，伴隨薑汁嘅既香辛，酒體柔滑，黑朱古力味誘發出使人回味嘅餘韻。

Glenmorangie Quinta Ruban 12 年單一純麥威士忌

Quinta Ruban 係指呢一支12年作品擁有葡萄牙Port酒桶嘅額外加持，添加咗extra濃厚嘅黑朱古力、咖啡、拖肥嘅香甜。入口時柑橘、奶油、玉桂、堅果等等風味漸漸爆發，咁柔順嘅酒體有呢個層次嘅複雜性係超乎想像嘅，最後嘅收結令人聯想起醇厚嘅薄荷朱古力，如果能夠襯埋甜品，就係天堂一般嘅體驗。