日本人做事認真就係人都知，就連清酒嘅風味佢地都有特定嘅名稱同標示，識得根據呢啲專業字眼揀酒，就一定無撞板啦。

「辛口」、「甘口」酒度

照字面解，好易會覺得隻好辣，不過以日文嘅意思係解 Dry，即係好以香檳嘅 brut 一樣。日本人最鐘意飲嘅Asahi Super Dry啤酒就係以「辛口」馳名。相對於「辛口」嘅形容詞就係「甘口」，即係甜Sweet。

日本人研發咗一套「日本酒度計」去測量辛甘口嘅程度，只要將呢個計擺入 15℃ 嘅清酒入面，佢就會得出一個「+」或「-」嘅數值，正數 (+) 愈大則代表隻酒愈辛口，負數 (-) 數值愈大，則表示甜度愈高。

「酸度」

另一種指標名為「酸度」，一般嘅清酒酒標都會有個酸度數字，大多都介乎0.5至3.0之間。科學層面而言，酸度係測量酒液入面嘅酸性物質 (果酸、乳酸等) 含量，數值低者屬於淡麗風味，反之則屬於濃厚豐醇。

 「薰、爽、醇、熟」

大約廿幾年前，日本酒侍酒研究會(SSI)為市場上大約3萬幾支清酒進行品鑑，並且跟據佢地嘅風味而分成「薰」、「爽」、「醇」、「熟」4個主要類別。

薰酒 : 香氣四散型，酒香充滿豐盈嘅花香、果香，擁有適度嘅甘甜口感，仲有圓潤清新嘅酸度。大部份嘅吟釀作品都屬於呢個類別，適合配襯海鮮或者白肉等等味淡嘅菜式。

爽酒 : 清新輕快型，爽酒無乜強勁嘅酒香，通常啲酒評人都會話呢啲酒係內斂而含蓄，入口時可令味蕾得到新爽感覺，令人心曠神宜嘅蘋果酸帶嚟輕快口感。

醇酒 : 風味濃郁型。一飲就能夠感受到好豐潤飽滿嘅口味，通常會係奶油、乳酸，樹木嘅氣息，好嘅醇酒能夠使各種強烈風味得到優秀嘅調和，通常純米酒都會屬於醇酒類型。

熟酒 : 成熟變化型。清酒比較少陳年熟成嘅作品，但亦都有啲「古酒」係經過歲月嘅磨練，熟酒通常酒香會比較濃烈，會有少少雪莉酒嘅辛香，飽滿嘅酒體，搭配一啲味道濃烈嘅食物，例如日式slow cook 牛腩一流。