懂得選酒係每名男士必備嘅技能，假若你希望精心安排嘅晚餐能夠得到最佳嘅餐飲體驗，可以參考吓呢篇入門教學。葡萄酒種類廣泛，易學難精，要詳細講可能十篇文都講唔哂，不過，只要認識一啲基本概念，即使去到最講究嘅法國餐廳都唔會死傷慘重。

去高級法國餐廳食飯，Sommelier (侍酒師) 會徵詢你嘅意見，為你安排今晚要享用嘅葡萄酒。餐前酒係最先要面對嘅選擇，其主要目的係開胃、促進食慾，所以最好揀酸度適中而唔太甜嘅酒。飲完第一杯酒之後，侍者會為你點菜，兼且會送上兩份厚厚嘅酒單俾你做Pairing，男士手上嗰份會顯示價格，女士手上嗰份就無嘅 (因餐廳而異)。

食完開胃前菜 (Amuse-gueule)之後，就會進入試酒環節。法國菜一般都會按照前菜、魚、肉、甜品嘅次序上菜。如果對每一道菜嘅Wine Pairing都非常講究嘅朋友，可以用by glass嘅形式品嚐多款作品，但無論如何，男士們至少都要為主菜選酒。葡萄酒配餐嘅原則大可以分為3類 : 一、地酒地食，二、風味相近，三、互補長短。

第一類地酒地食相信唔少人都聽過，當地嘅特色佳餚，最好一定係配返當地出產嘅酒，原因好簡單，因為嗰道菜式本身就係born with the wine，兩者相配嘅風味係彼此誕生嘅理由。風味相近係指味道相似，例如重口味嘅肉類料理配搭厚身味道香濃嘅紅酒，而新鮮細緻嘅海鮮料理配搭優雅嘅白酒等等。最後嘅互補長短就比較深，食物同酒嘅marriage，可以令彼此嘅缺點變成優點，例如油膩感重嘅菜式搭酸度較高嘅清爽葡萄酒，兩者一夾埋更加相得益彰。

「紅酒配紅肉」、「白酒配白肉」呢個講法亦屬味道相似嘅配襯法則。味道香濃嘅牛肉菜式、例如牛排、燉牛肉通常都係配搭同樣濃郁嘅波爾多或布艮地紅酒，葡萄種類尤以Cabernet Sauvignon、Merlot 等混釀為佳。相對而言，魚肉、生蠔之類嘅海鮮料理，就可以配搭Chardonnay、Sauvignon Blanc等花香、果香四溢，而且風味優雅嘅白酒，等你杯酒唔會掩蓋咗海鮮嘅鮮味。

若清楚以上嘅概念，事情就易辦得多，因為你旁邊仲有一位好幫手 : Sommelie!侍酒師非常專業，佢一定能夠為你提供Wine Pairing嘅意見，你甚至可以直接叫佢決定。不過為咗響女伴面前顯示自身品味同知識，大家不妨問嘅時候加少少條件，例如「想要一款果香味重，比較厚身嘅波爾多」，又或者「想試一試New World嘅作品」之類。我遇過嘅侍酒師都經驗豐富，好知道客人嘅想法，假若你心目中有個Price Range，只要響酒單道出一款價錢相近嘅酒，問問佢有無呢一類嘅選擇，侍酒師就會明白你嘅Budget，咁數字嘅野不必明言。

如果覺得呢啲基本嘢都太難，我仲有一招，就係香檳。Champagne 基本由餐前酒到甜品餐酒都可以勝任，真正萬能百搭。香檳大路品牌 : Taittinger、Pol Roger、Bollinger、Krug、Louis Roederer、Veuve Clicquot、Piper-Heidsieck、Pommery、Moet & Chandon，從以上嘅名字之中，依預算揀選就可以。

具備選酒技巧係男士嘅風度之一，但兩人約會最緊要嘅都係溝通，好好了解女伴嘅口味同佢對葡萄酒嘅喜愛程度都十分重要，免得開咗枝Margaux先知對方酒精敏感啦。