Lange 1 Tourbillon Perpetual Calendar 係品牌第一隻玩Lange 1風格嘅萬年歷錶，大家可以睇到錶盤都頗為繁複，最外圈為月份顯示，3點位較大嘅計時盤有時、分刻度，內裡包含埋日夜顯示。6點位係閏年數字，7點位月相顯示，而9點位嗰一堆係 Day-of-Week，除咗日期之外，連星期幾都show埋你睇。

將外圈整做月份都係新做法嚟，隻錶用咗一個旋轉外置月份環，取代咗傳統嘅48齒輪推進。呢個環由內部齒輪驅動，每年會圍繞軸心自轉一圈。齒圈內設有外圍缺口同波浪形凹槽。負載游絲嘅取樣槓桿會滑過呢個缺口，偏轉程度同凹槽深度相對應。偏轉越多，月份越短。

去到 2 月，取樣槓桿嘅延長裝置同閏年圓盤底部的凸輪接觸，令裝置分辨出呢年只有365日，又或者屬於閏年，即2月有29日。

腕錶有兩個機械動力儲存裝置，確保佢咁多個日曆都可以準確跳動。其一係用於每日推進日期、星期同月相顯示，其二係用於切換月份顯示環同閏年圓盤。當指針經24小時輪走動，日常切換過程嘅動力會同時累積落嚟。其輪心所搭載嘅圓軸透過負載游絲嘅槓桿取樣。經過24小時，槓桿從頂點落下，使凸輪突然向前轉動。正因如此，切換動作並唔會影響擺輪幅度。而用於切換月份顯示環和閏年圓盤嘅另一個動力儲存裝置，亦都係採用相同原理，在整個月間累積動力。

錶廠自製嘅L082.1型機芯，有萬年歷兼具停秒功能嘅陀飛輪，複雜到爆。21K金中置自動轉盤，鉑金950離心輪位於最底部。624個機芯零件之中，陀飛輪所佔嘅數目不少於84個。日曆模組位於頂部，顯示出多項清晰易讀嘅資訊。