如果聽日係世界末日，咁我一定會揀枝而家係高峰適飲期嘅香檳。上到太空九死一生，所有好酒都要趁早飲，擺得太耐都未必有命享。飲過咁多個品牌、咁多個年份、咁多種類嘅香檳，至今我嘅 (呢一刻) 首選都係呢枝 : Dom Perignon P2 1998年。

呢枝98最初於2005年面世，上年P2重新出品，向各位飲家示範咩叫巔峰適飲期。每枝擁有具大潛力嘅葡萄酒都需要陳年，不可太早，亦不可太遲，我地要留意該年嘅葡萄收成，釀製方式去考慮該作品嘅適飲期。

Dom Perignon嘅所謂P1、P2就係第一次適飲巔峰、第二次適飲巔峰咁解。據Dom Perignon總釀酒師Richard Geoffroy嘅講法，P1 係介乎8年左右，香檳嘅整體感覺會比較和諧；P2 則係15年，口感、活動、風味都達到最佳平衡；P3 就要30至40年時間，此香檳嘅穩定同複雜性已經升華到另一個層次。

P2 1998就如Geoffroy所言，係各方面都達到一個超乎預料嘅平衡，堪稱完美。酒香豐盈醉人，蜂蜜、香料、礦物味、碘鹽產生複雜香氣，酒體泛着迷人汽泡，細緻而綿密，口感濃郁得恰到好處，酸度、甜度都被發揮得恰如其份，唔會搶鏡，亦唔會使人錯失，層層交織出深邃醇厚嘅風味，真係叫人欲罷不能。