Sherman 係一隻體型細小嘅機械人，唔識行路，唔識講野，亦唔可以上火星，不過佢有樣野做得好好，就係報時。Sherman鐘由MB&F構思開發，並由L’Epée 1839座鐘製造廠協力完成，佢嘅誕生係因為Maximilian Büsser細個嗰陣想有個機械人朋友，就好似星戰入面，天行者同隻R2-D2咁，所以長大後就完成返自己嘅夢想。

Sherman擁有L'Epée 1839的直線型8日動力儲存機芯，一周之內唔需要上發條都可以顯示到正確時間。發條蓋板向下延伸以支撐履帶，機芯墊片發揮肩膀同手嘅功能，對眼則為支撐調節器嘅螺絲。

機芯板、時計夾板同時構成咗Sherman嘅骨架同軀幹。鐘面響正心口，而頭頂嘅透明吹製水晶玻璃弧頂，展現咗內部嘅機械運作。佢對手係郁得嘅，並至可以愛嚟固定一支筆、或者自己嘅發條匙添。

講返Sherman呢個名其實係來自第二次世界大戰，美國同盟國所使用嘅M4 Sherman戰車。佢擁有高度可靠性、且生產容易，即使當時有更多新晉戰車，M4 Sherman 仍然備受重用。佢本來個官方名叫做Medium Tank M4，係後來英軍以一位將軍嘅名字，幫呢架Medium Tank M4定名為M4 Sherman。呢位將軍就係美國南北戰爭時期，擔任美軍指揮之首嘅William Tecumseh Sherman，英國軍史學家B. H. Liddell Hart更稱佢為「第一位現代將軍」，可想而知有幾猛料。

Sherman 鐘將會推出200座鈀金鍍銀飾版本、200座純金鍍面黃金版本、同50座鑽石飾面版本。