對飲Wine無要求嘅人，連用紙杯飲酒都無所謂，佢地唔會理飲緊嗰杯係First Growth定樓下超市餐酒，總之係酒就OK。呢一類追求飲酒精嘅酒徒，又的確唔需要買杯嘅。至於有心想了解葡萄酒世界嘅朋友，合適嘅酒杯將會係你必要嘅配備。

一隻靚酒杯嘅設計完全係由葡萄酒，啲工匠會不斷思考，到底點樣嘅杯先有利於品嚐酒液，市面上五花八門嘅葡萄酒杯，都有佢獨特嘅應用之處。我地今次睇睇啲基本配備先。葡萄酒簡單嚟講可以分3大類 : 紅酒、白酒、汽泡酒，佢地各自都有合適嘅酒杯。

紅酒杯，一般而言，紅酒杯嘅杯肚較闊，而杯口會向上收窄，呢個設計係為咗令飲家有更多空間搖杯，酒香更易散發，杯肚廣闊，酒同空氣接觸面較大亦係因為紅酒更需要「透氣」，杯口收窄則酒香會更為集中，而酒杯嘅曲線亦更優美。

白酒杯，白酒飲用溫度較低，所以杯腳會設計得更高，避免你拎隻杯嘅時候，酒液會受人體嘅溫度影響。杯肚同杯口相對紅酒杯而言都會比較細小，主要原因係希望保持其低溫、香氣於合適嘅水平。

香檳杯，多數嘅香檳杯都採用笛形 (flute) 設計，高身瘦長，主要目的係欣賞香檳綿密嘅汽泡，杯口咁窄，有效減低空氣接觸範圍，令汽泡能夠更持久。除咗主流笛形，香檳杯仲有碟形、鬱金香，每一款都有利有弊，無絕對嘅啱同錯。

當然呢3款酒杯只算係入門嘅基本配備，再依據酒嘅個性可以再分成波爾多杯、布艮地杯等等，咁鬼多款，講到尾都係為咗展現葡萄酒嘅特質，令品酒嘅層次更加深入細緻。