上次簡單地講解咗陀飛輪結構，係時候要邁進到另一領域 — 具有古老傳統嘅三問錶 (Minute Repeater)系列。以最簡單嘅說法，三問係指以音調分別表示出「時」、「刻」、「分」三組時間。

Ulysse Nardin Tourbillon Jaquemarts Minute Repeater Alexander The Great

三問係一個相當複雜嘅機械系統，試想像入面嘅結構需要按照錶盤運行狀況，自身敲擊出「低」、「高低兩音」、「高」，共三種音調模式嚟準確報時，係一件幾咁困難嘅事，所以其昂貴價格係可想而知嘅。

以一般三問錶嘅運作模式而言，假設手錶嘅時間係6點35分嘅時候，報時系統就會敲擊「低音」X6、「高低兩音」X2、「高音」X5，因為「高低兩音」係表示一刻，即15分鐘，所以只會敲兩吓。

Zeitwerk Decimal Minute Repeater (呢隻係用10分鐘，而非一刻報時)

聲音報時，係方便以前啲貴族，夜晚唔駛起身拎蠟燭睇時間，又或者唔需要喺個袋度拎隻陀錶出嚟。做一隻基本三問錶，先要考慮本身時間運行嘅系統，仲要加上報時系統嘅配合，後者同樣要有動力來源、調速裝置、甚至要有啟動開關、問時系統以控制敲擊節奏，最後當然要有敲擊發聲嘅裝置先有聲響發出啦。

Classic Minute Repeater V.S. Decimal Minute Repeater (Mechanism)

睇睇歷史，1676年英國錶匠Edward Barlow發明咗使用鋸齒條 (Rack) 同埋蝸形輪 (Snails) 嘅機械結構，後來另一位英國錶匠Daniel Quare再改善呢個系統，仲拎埋專利，所以後世說法多數會話係Daniel嘅發明。去到19世紀末期，第一隻三問錶 (Minute Repeater)先真正問世，而除咗三問，歷史上出現過 Five Minute、Half Quarter、Ten Minute等唔同間距嘅鐘錶報時系統。