呢隻 Radiomir 1940 Minute Repeater 三問，唔單止係 PAM 品牌第一隻三問錶，仲要玩埋 “double” minute repeater，具兩地報時功能，號稱史上最複雜嘅Panerai 作品，作為2016嘅特別版腕錶，佢將會於5月18號，喺意大利嘅“Panerai: Dive Into Time” 展覽中同大家見面。

Panerai Radiomir 1940 Minute Repeater Carillon Tourbillon GMT 無疑係一單非常震撼嘅消息，十進位嘅兩地三問報時，完全將品牌嘅工藝表露無遺。搭載最新Caliber P.2005/MR機芯，三問報時架構加陀飛輪調節器，瑞士Neuchâtel研發中心一共用咗4年時間去完成呢件咁靚嘅藝術、工藝傑作。

你會見到錶殼8點位有個啟動報時機制嘅按鈕，3個音錘敲擊喺機芯、錶殼上數量相同嘅音簧去完成報時。PAM 採用3個音錘而非傳統嘅兩個，可以組合出更多變嘅音韻。第 1 條低音音簧負責小時，而第 3 條高音音簧負責表示分鐘，而中間多出嚟嗰條，就由表示一刻變成表示10分鐘，機制如同之前Zeitwerk Minute Repeater一樣。

例如而家嘅時間為 10:28，Panerai 三問嘅報時機制會係 : 10吓低音表示小時、兩吓「三連音」表示 20 分鐘，再加8吓單獨高音。為咗防止誤報，用家必先轉動錶冠去特定位置，才可以啟動報時按鈕，而用家亦可以由按動錶冠去選擇第一、第二時區嘅報時。

49mm玫瑰金錶殼，由兩個部份組合而成，錶盤玩鏤空設計，清晰地見到機芯運作，中置箭頭指針可以閱讀到第2時區嘅時間，3點位有晝夜顯示，8點位顯示時區 (HT = Home Time、LT = Local Time)，10點位就係陀飛輪啦。

動力儲存約 4 日，即96個鐘頭左右。限量版發行，用家可以自由選擇錶帶、指針或者錶殼質料，而售價則約USD$395,000，即大約300萬港紙，靚還靚，天價還天價。