Martell 馬爹利干邑，我細細個就聽過佢個名，到成咗年 (總之係合法年齡)，一試佢個經典藍帶 Cordon Bleu，先明白點解啲叔父輩咁鐘意飲，OK，我承認而家自己都可以俾人叫叔叔啦，將呢啲咁靚嘅佳釀傳承俾下一代後生仔，就自然係我嘅責任啦。

左起：The Ocean 主廚 Agustin Balbi、The Ocean 總經理 Cedric Jacob先生、
Pernod Ricard Hong Kong & Macau 執行董事Frantz Hotton先生、Martell 品牌傳承總監 Jacques Menier先生

馬爹利最近整咗個旅行酒櫃嚟香港，叫「Secrets of a Trunk」，據稱係由 10 位巴黎資深工匠耗費1,000個小時，以人手仔細雕琢珠地皮革櫃面、銅飾、銀牌、橡木、水晶、棉麻等細節，係一件不折不扣嘅藝術品。高級酒櫃大師Pinel & Pinel為28支佳釀設計出最完美嘅酒櫃，其中包括4支由品牌釀酒大師Benoît Fil精心炮製嘅Les Assemblages Exclusifs。

Martell「Secrets of a Trunk」旅行酒櫃

酒櫃入面滿足到干邑收藏家一切需求啦，包括玻璃酒杯、鍍銀冰桶，以至雪茄剪、煙灰盅同打火機等等。櫃內仲有本藍色皮革封套嘅《釀酒大師筆記》小冊子，記載咗Benoît Fil嘅手寫品酒筆記，仲有啲空白頁俾讓酒櫃主人記錄品鑑干邑佳釀嘅心得。

The Ocean

「Secrets of a Trunk」將會擺放於淺水灣The Ocean入面做展覽，為咗隆重其事，餐廳將推出為期一個月嘅特色菜單，同多款手工雞尾酒。The Ocean 行政主廚Agustin Balbi 構思嘅菜單，主打簡約方式烹調嘅海鮮，菜單將會選配 3 款Martell干邑，菜式包括頭盤煙燻帶子、熱頭盤嘅香草燒白蘆筍、龍蝦及羊肚菇；仲有主菜嘅北極紅點鮭。

The Ocean x Martell - 配酒菜單 - 香草燒白蘆筍、龍蝦及羊肚菇

甜品包括有榛子、山莓雪葩、意大利香醋伴巧克力森林蛋糕，配Martell XO。呢套獨特菜單供應期只限一個月，需於最少24小時前預訂。除咗品酒菜單外，主任酒保Alex Ko都創作一款全新嘅雞尾酒「Message in Bottle」，玩Martell Noblige嘅香醇風味。雞尾酒結合血橙、甜香艾酒 (vermouth)、蜜糖糖漿、檸檬同angostura，開胃酒可口嘅果味同醇厚嘅干邑交織成和諧嘅享受。

The Ocean x Martell - 配酒菜單 - 意大利香醋伴巧克力森林蛋糕

查詢訂位 : 2889 5939