之前Smart Bottle想法係好，但全電子化嘅代價係酒液嘅選擇有限。實不相瞞Coravin有個Model Two取酒器，開酒嘅時候，無需取出軟木塞，直接倒酒裝瓶，呢個產品適用於任何葡萄酒樽，仲要輕巧易攜，出街開Party，去朋友屋企House Warming，一樣大派用場！

呢個發明來自Greg Lambrecht，佢除咗鐘意飲酒之外，仲有物理、機械工程和醫療設備背景。Coravin取酒器嘅原理亦由此而起，Greg構思出於軟木塞原封不動嘅情況之下，以醫療物料製造嘅取酒針，拮穿軟木塞從而取出瓶中酒，拎返枝針出嚟時，軟木塞能夠重新密封，剩餘嘅酒就可以擺返入酒窖。

使用方法好簡單，一、揀枝靚酒，任何軟木塞都可以；二、快速按下板機，清除酒針內嘅空氣，將取酒器夾上瓶頸，再壓低取酒針拮穿木塞 (唔係日文名)；三、鬆開板機如常地倒酒，當酒液流出速度變慢或者停止時重覆動作，最後棟返起枝酒。

Coravin有專利氬氣瓶蓋，其專利嘅裝載分子技術，可以幫助酒樽喺每次倒酒之後變返密封嘅狀態。Coravin Model Two套裝會包埋取酒針、兩樽Coravin氬氣瓶、Coravin酒瓶套同理一組取酒針清潔工具，定價港幣2,800大元！