男士們，如果你買隻積家送俾女伴，至少證明咗你好大機會有以下 3 項特質: 一、你有啲錢，二、你有啲年紀，三、你好重視道德原則，前兩項唔解釋，第3樣其實係講積家係好重視 ethic 嘅品牌，如果你份人玩味好重，好少可會揀積家。又如果你識得買 Christian Louboutin 做禮物，更加證明你懂得哄女士們歡心，識同時滿足佢地對虛榮與美學嘅追求。

積家為興祝Reverso 系列85周年，特登搵咗 Christian Louboutin 做 Crossover，Oh! Thank God，哄女終於唔駛分開兩樣嘢買。Atelier Reverso 系列本身就係一個經典嘅翻轉設計，一隻腕錶有兩個錶盤，散發出截然不同嘅感覺同個性，配搭埋 Christian Louboutin 嘅優雅氣質，連身為男士嘅我地都知係靚嘢啦。

正面有個淺色錶盤表現出 Reverso 系列嘅優雅氣質，日間配搭埋輕鬆嘅悠閒服，唔會過於誇張隆重，去到夜晚要瑰麗啲，翻一翻轉錶殼，有個深色錶盤，好有 Christian Louboutin 嘅迷人魅力，出席宴會大場面相當合適。兩個都揀唔啱唔緊要，積家仲有個性化訂製服務，俾你追求夢寐以求嘅錶盤。

不過，以女士嘅角度諗，收到一隻 Christian Louboutin 設計嘅錶盤，點都好過你擺兩個人嘅合照囉。