由日本人設計返日本酒瓶，份外有神韻，就算佢係玩當代藝術都好，仍然無比匹配。日本著名藝術家村上隆，同一隊名為NEXT5嘅釀酒師團隊，聯手製作咗一系列太陽花笑面設計嘅日本酒，重新演繹高雅嘅日本傳統工藝。

唔好睇佢玩味十足，論清酒本身都來頭不小，NEXT5呢個隊伍可謂全明星班底，當中有秋田釀造第3代掌舵人‧小林忠彥 (名物 : ゆきの美人)、新政酒造第8代目‧佐藤祐輔 (名物 : 新政)、福祿壽酒造第16代目‧渡邊康衛 (名物 : 一白水成) 等等，每一位都承傳多年釀造工藝，佢地走埋一齊，只為創造出新世代嘅日本酒。

村上隆 (下中) & NEXT5

呢款清酒標榜使用秋田嘅原材料，加手人精製，所以產量非常有限。如果對日本比較有認識嘅朋友，一定知道秋田縣出名兩樣嘢，一、靚米；二、美女，後者大家未必接觸得到，但秋田米喺CitySuper、一田，好多地方都有得賣，已經係名揚天下嘅靚米，使用當地靚米釀酒，已經贏咗一半啦。

酒液為日本酒之中最高級嘅純米大吟釀，原料為山田錦‧秋田酒小町45% 精米，酒精度約15%。純米大吟釀級別，為咗品嚐其細膩度，都係冷飲比較適合。

村上隆X NEXT5 日本酒，有幾個版本，呢隻黑樽配白色花花包裝係原版，限量5,000 枝 (750ml)，每枝只係3,500円，係咪覺得好平? 另一個仿江戶時代嘅陶器版本就唔同講法啦，同一款酒，搵上新裝酒瓶，可以賣得好貴。

最左邊「金レリーフ」，即金色浮雕，係用真金製，附親筆簽名，賣緊170,000円，以7算計，都要港紙皮幾嘢。中間白色浮雕同鈷藍釉，一樣咁靚，分別賣50,000 同 35,000円，對於村上隆FANS而言，必然係覺得物有所值，但純粹為飲酒，都係買原版最好啦。