月相錶 Moon Phase Watch，即錶盤可顯示月球陰晴圓缺嘅變化，一般設計都係半圓視窗入面有月球嘅圖象掠過，以表現出月相周期嘅演變，如新月、上弦月、滿月同下弦月。錶匠非常聰明地將天文學嘅月亮運行周期轉化成腕錶功能，月相錶多以29.5日為月亮運轉標準，而高級機械錶如 VC 江詩丹頓甚至可以準確到以29日12小時45分鐘為單位，同實際月相周期嘅誤差只有57秒，每日誤差不到兩秒，呢個誤差值就決定咗你要幾耐調整一次。

近年其實有唔少好高質嘅月相腕錶登場，既然時入初秋，佳節當前，我都覺得係時候帶大家睇一睇呢啲作品。

Omega Speedmaster Moonphase Master Chronometer

Omega 今年出品一隻非常靚嘅藍色月相錶，深邃嘅藍更突顯出夜空、宇宙嘅恢宏感覺。44.25mm精鋼錶殼，配上藍色錶盤、藍色陶瓷錶圈，上面更設有液態金屬測速儀刻度，採用Omega 9904大師同軸擒縱天文台COSC機芯，月相部份準確度達10年為調整期限。

積家雙翼系列，以日曆配搭月相展現出高超工藝，今年登場呢隻Duomètre Quantième Lunaire仍有專利Dual Wing系統，兩組互相獨立嘅機械裝置，分別為腕錶嘅顯示同調節機關輸出動力，積家381型手動上鏈機芯，具兩個發條盒，可提供到50小時動力儲存。白色錶盤上有手工雕琢之月相圖案，星光閃耀，浪漫至極。

最後同樣優雅嘅仲有朗格今年嘅新作 : Saxonia Moon Phase Watch，18K金框架加上雙視窗設計，小秒盤同月相互相結合。L086.5型自動上鏈機芯可以用單一發條盒提供達72小時嘅動力儲存，月相顯示部份連接小時齒輪，月相裝置重現於兩新月之間嘅時間，準確率高達99.998%，意思為122.6年之後，用家先需要校正一日。