從炎夏進入初秋，氣溫屢破新高，再食啲油膩嘢點頂得順呀！？喺Wine Pairing配酒嘅世界，如葡萄酒可以同菜式做到相輔相乘，互相隱惡揚善，整個飲食體驗肯定幾何級數跳升。Riesling，一個德國葡萄酒嘅代名詞，可以化身成香濃甜蜜嘅貴腐酒，亦可以演繹酸度突出，清爽宜人嘅白葡萄酒，最重要係佢多數都好平，好易喺附近超市買到。

Riesling主要產區為德國、法國阿爾薩斯地區，葡萄本身較為耐寒，種植時間較長，葡萄園常設於較北嘅地區，釀製而成嘅葡萄酒變化多端，花香、甜味、酸度三者表現皆非常獨特同出色。全世界Riesling作品，有近6成都係德國出產，Riesling如擁有出色嘅酸度，將帶嚟更佳嘅複雜性同層次。

中菜，我地最常接觸到嘅菜式，Wine Pairing方面，除咗萬能嘅香檳之外，最佳配搭肯定係Riesling。中菜烹調方式較為多油，味道較濃且多汁，甚至常有辣口惹味嘅菜色，喺呢個時候，清爽嘅Dry Riesling就大派用場啦！Riesling充滿檸檬、菠蘿、梨、蘋果果香，入口更有蜂蜜、柑橘花、生姜等花草香，令人眼前一亮嘅酸度、乾澀口感有效中和濃濃嘅油膩感，如果配搭甜味較重嘅食物，酸而不甜嘅Riesling更可幫助突顯食物中嘅香甜，甚有奇效。

夏天飲白酒比紅酒優勝之處，在於白酒可以凍飲，我並唔係指冰鎮啤酒嗰隻 Frozen，而係6至10度左右嘅微涼適飲溫度，如果太凍，酒體本身嘅味道就會被收縮，基本上唔會飲到啲咩味。除咗德國、法國，其實澳洲嘅Riesling都相當不俗，例如Penfolds Koonunga Hill Autumn Riesling，擁有清新優雅之花香，微微水果香甜，重點在於活力十足嘅酸度同乾澀口感，餘韻極為新清，配搭濃味海鮮就最正。