喺蘇格蘭威士忌雄霸酒壇之前，其實真正威士忌強國係愛爾蘭，甚至可以話係威士忌發源地。Whisky呢個字，係源自愛爾蘭蓋爾語「uisge beatha」，意即生命之水；18世紀嗰陣，愛爾蘭曾經有超過2,000間蒸餾廠，而都柏林Dublin更被視為威士忌界嘅聖城，其出品之Irish Whiskey瘋行世界，盛極一時。不過時移勢易，今日Scotch先係主流，縱然愛爾蘭威士忌盛世已過，但佢地嘅釀酒技術源遠流長，無疑係世界頂級。

於愛爾蘭卡洛郡Royal Oak重開嘅Walsh Distillery

Bernard & Rosemary Walsh夫妻就遵從愛爾蘭傳統釀酒方式，以古法重製數百年前極受歡迎嘅Irish Whiskey。呢度講緊嘅古法，就係以純銅蒸餾器Pure Pot Still進行三重蒸餾，而我地好多飲開嘅蘇威，都只係採用二次蒸餾。Writer’s Tears系列，就係以愛爾蘭古法整出嚟嘅作品。

「綠帽」裝Writer’s Tears，為美國橡木桶陳年之作品

Writer’s Tears系列最新傑作，Red Head Single Malt。點解強調紅頭係因為Writer’s Tears頭兩枝Copper Pot、Cask Strength都係「綠帽」裝，樽蓋係綠色嘅。正所謂綠帽唔怕戴，最緊要除得快，今次用Sherry Butt轉紅帽，當然令人眼前一亮啦！此作品只用西班牙Oloroso雪莉酒桶陳年，並無調和其他原液或做過桶程序，為保持最細膩嘅風味，酒廠最後都係用Non-Chill Filtered，酒精度達46%。

聞香時具有橙皮嘅清香，乾果、布冧嘅濃郁水果香甜；入口係豐盈嘅西班牙Oloroso雪莉桶氣息，香辛味重，但三重蒸餾之下，口感非常順滑；餘韻係柔和、複雜嘅橙香，悠長而舒服。Red Head為限量版作品，只會發售12,000枝，就算官方尚未公佈價錢，已經令好多飲家引頸以盼。