要保證一個機關運作暢順，完善嘅監察機制係必需嘅，社會如是，腕錶亦如是。唔知大家仲記唔記得上代Urwerk EMC Time Hunter，即軍綠色嗰隻，嗰陣已經玩到可以測量擺輪幅度，當睇到擺幅角度只剩200度左右，你就知道係時候要抹油，係咪好安心可靠? 最好玩係呢個功能要叉電先用到，用家可以利用錶殼右邊嘅搖桿，進行人肉叉電，好原始得嚟又好高科技！

今次推出嘅新錶X-Ray仍然保持Time Hunter系列出色嘅監察機制，同樣用3點位搖桿為手錶電路叉電，錶殼左邊按鈕啟動11點位置嘅擺輪頻幅顯示，呢個充電系統係由製作NASA火星探測器嘅工程部門負責，保證腕錶可以人肉充電十萬至廿萬次，太空科技配置於腕錶之上，相信用家們都無可挑剔啦。

喺錶底蓋，你會見到有個螺絲位去控制游絲有效長度，以改變擺輪嘅慣性力矩同振幅周期，一個Option俾用家自行調整，省卻拎去Watchmaker度維修嘅時間。腕錶搭載一款手動上鏈機芯Calibre UR-EMC，有雙發條盒，提供到80小時嘅動力儲存。43 X 51mm錶殼為鈦金屬、鋼質加黑色PVD處理，錶面、底都係藍寶石水晶玻璃，Skeleton鏤空錶盤造工好精細，finishing極之出色。X-Ray同以前一樣，都係限量15隻，極之珍貴，價錢為USD$129,000。