雖然我對古羅馬歷史興趣不大，但睇到Christophe Claret Aventicum嘅小金人都「嘩」咗一聲；44X52.11 mm嘅錶殼之中，有個非常立體嘅Marcus Aurelius半身金雕，雕工配合三維全息技術mirascope，造成強烈嘅光學錯覺，3毫米不到嘅雕像仍極有氣勢地聳立於錶盤嘅中心，原來玩喺機械錶上面玩3D技術，可以咁鬼過癮！

Aventicum係Christophe Claret向古羅馬海爾維希亞首都嘅一種致敬；1939年，當地遺址出土Marcus Aurelius大帝純金半身像，同類型雕像世上僅存3座，而家金像真身由阿旺什羅馬博物館Avenches Roman Museum保育中，唔認識Marcus Aurelius唔緊要，總之呢件係人類史上其中一件無價文化遺產，錶廠亦希望藉Aventicum喚起國際社會對保育活動嘅關注。

腕錶上每個半身金像均由瑞士工匠，以人手花費整整一個星期雕刻而成，再巧妙地通過三維全息技術令佢有被放大嘅視覺錯覺。呢次係Mirascope史上首次應用於腕錶製作之上，簡單講，個裝置係兩塊相同嘅拋物鏡上下疊放而成，外觀呈現出橢圓狀，上方凸鏡會有一個窿仔，當金像被放置到下方凹鏡嘅中心嘅時候，其全息形像就會喺上面塊鏡度映照出嚟，視覺效果幾乎係實際尺寸嘅兩倍！

全新設計嘅指針採用既強靭而輕巧嘅耐蝕鋁合金，確保運行穩定。錶背與錶面同樣精彩，藍寶石錶鏡之下可以睇到五架馬車追逐奔馳嘅場面。另外錶盤、錶背仲有迷宮圖案同Marcus Aurelius嘅格言。Aventicum備有限量68隻嘅5N玫瑰金配煙燻色PVD處理5級鈦金屬款，售價USD$55,000；限量38枚高鈀白金配煙燻色PVD處理5級鈦金屬款，售價比紅金版再貴啲，達USD$60,000。