如果體育、文化、藝術無GDP貢獻，如果憑傳銷買樓都可以做傑青，可以印證傳頌已久嘅獅子山精神，其實只係「搵食」兩字。刻苦耐勞、靈活變通、永不言棄，說來好聽，但萬變不離其宗，仍是金錢掛帥。最近呢單新聞亦令我想起日本一位獨立製錶師 — 菊野昌宏，佢從日本自衛隊隊員變成錶匠，並矢志將日本文化、藝術，融入傳統製錶工藝之中，從而超越時代之規限。

人依靠雙腳走出歷史，同時亦用雙手創造時計，菊野昌宏並非甚麼偉人，佢只係於朝代更替之中，為時計扮演一道橋樑嘅角色，承先啟後，讓技藝、激情得以傳承。菊野昌宏，1983年生於日本北海道，高中畢業後加入自衛隊做整備隊員，直至2005年開始於Hiko Mizuno College of Jewelry學習製錶，後來其作品得到國際獨立鐘錶創作人學會AHCI認證，2013正式成為AHCI會員。Basel World都會見到AHCI嘅作品展覽，標榜獨立、手作、以藝術風格為先嘅腕錶，會員人數至今亦只有約三、四十人。

2011年第一代「和時計」

2011年，菊野分別發表Perpetual Calendar Tourbillon同埋第一代「和時計」Temporal Hour Watch，當時就係以呢兩款作品成為AHCI嘅候選會員，前者萬年曆陀飛輪顯示出工藝、技術性，而後者「和時計」則具有濃厚和式韻味，展現出強烈嘅風格同藝術氣息。及後佢每年都會發表一隻作品，及至最近嘅第二代「和時計改」，錶盤又重回「不定時法」設計。

打磨

鑲嵌，一一由人手完成

始於日本江戶時代，傳統嘅日本鐘錶文化叫「和時計」，時計係日語漢字嚟，兩個字夾埋表示計時工具，並無中文入面「鐘」、「錶」之分。古代日本人嘅計時，係將一日先分成日、夜兩半，再將每一半分成6份，變成近以現代「小時」嘅概念，而呢個依照現實生活嘅計時方式亦叫「Temporal Hour 不定時法」。不過大家可以想像到，以日照時間分劃，咁每小時嘅間距會變得長短不一，而且需要隨季節調整。及至1873年，日本明治維新全面以西洋鐘錶、計時法取代「和時計」，從此變成歷史。

第二代 : 「和時計改」

由於全人手獨立製造，所以每年菊野都只能夠做到一隻咁大把，稅前價格一千八百萬日元，對返港幣1,350,000左右。等等，如果你開始讚嘆別人年薪之高，咁你又會跌入「獅子山精神」嘅圈套之中，菊野之成就應該歸功於其精巧工藝、對日本文化之承傳，仲有對鐘錶界嘅貢獻。至於賺到幾多錢只是錦上添花，明眼人才不會本末倒置。