喜歡飲Islay Whisky嘅朋友，多數都係鐘意佢強烈而濃厚嘅煙燻、泥媒氣息，入口充滿質感、層次，仲有充滿回憶嘅「正露丸」味。The Glenrothes最近兩枝新酒，一枝Vintage Reserve 12年，玩12款不同年份嘅Whisky Blending；另一隻Peated Cask Reserve，擁有非一般嘅輕盈泥煤味，簡單Slight Touch，於餘韻慢慢浮現，同本身Islay堆重口味好唔同!

The Glenrothes Vintage Reserve 12年其實係超班嘅12年酒。蘇格蘭威士忌有個法例，出Age Statement嘅時候，你只能以最年輕嗰隻為準，意思係即使你隻威有99%係50年，只要有1%係12年，你喺酒標之中都只能講佢係12年威士忌。The Glenrothes調和咗 「1973、1978、1979、1982、1985、1986、1987、1998、2000、2001、2002、2003」，12個年份嘅原液入面，陳年佳釀嘅比重都好高，所以話佢超班係有根據的。

非常優美嘅金銅酒色，酒香散發淡然之柑橘、蜂蜜香甜；入口嘅時候有紅莓果香，堅果嘅微甘，非常細膩嘅辛辣；酒體幼滑Creamy，餘韻變化為層次有序嘅柑橘、蜂蜜、雲尼拿香甜，悠長而舒適。售價為HK$550，以枝酒嘅質素嚟講，性價比算係相當唔錯!

另一款The Glenrothes Peated Cask Reserve玩輕盈泥煤，貫注咗Islay嘅靈魂風格，但又演繹出另一種形態，確係值得一玩。Peated Cask Reserve喺釀製過程之中，將優質威士忌原液置入Islay橡木桶，從而產生如斯獨特嘅化學作用，有幾可試到一隻泥媒威士忌係以優雅、果香、細緻甜味為主調，而泥媒係排在最後，好似secret door等你發掘?

淡金色之酒色，顯出呢款威士忌其實比較年輕 (而佢亦無show age statement)，聞香時感受到新皮革、白酒香、果香甜美，仲有絲絲泥煤；入口為淡然嘅雲尼拿、香辛當中有啲橙皮香甜，將臨劇終先發掘到親切嘅泥煤風味，只係少少，唔會喧賓奪主。售價HK$715，鐘意Peat嘅飲家，包你有驚喜。

為咗隆重其事，The Glenrothes同香港頂級中菜廳「禮賓傅」搞咗個8道菜嘅Whisky Pairing Menu，從今日至到12月1號，可以用HK$980試到。到時飲家們可以感受到以新Peated Cask Reserve入饌，尤其係中菜，原來可以咁適合!