時至年尾，又係準備2017錶展嘅時候。各個品牌都會於呢段期間陸續預告自己有咩錶款，如果係驚世之作，就更令人期待一睹其廬山真面目。今年有咩矚目新錶? 首先要講嘅，一定係江詩丹頓Traditionnelle陀飛輪三問，同埋Patrimony月相&逆跳日曆，前者選取三大機械錶複雜工藝之二，卻保持輕盈優雅姿態；後者玩精巧月相，但改以錶冠直接調較，大大方便用家操作。

江丹詩頓Traditionnelle陀飛輪三問

Traditionnelle系列之新款佳作，運用全新VC 2755 TMR機芯，配備三大複雜工藝之中嘅陀飛輪同三問功能，分別推出Rose Gold同鉑金款俾用家選擇。錶盤設計方面，小時、分鐘指針偏置於上半部，下半預留空間展示優雅嘅陀飛輪架構同小秒針運作。腕錶重點鮮明，實在唔需要太多旁枝，但VC仍然著重細節嘅處理，機芯有標誌性之馬耳他十字造型、手工拋光之陀飛輪架橋；外觀上更有精緻嘅手工機刻雕花圖案，而腕錶整體亦較輕巧，錶殼44mm，厚度僅為12.2mm，相較前作更為清減亦不失為一件美事。

江詩丹頓Patrimony月相&逆跳日曆

兩個款式分別對應紅金、白金質料，月相盈虧於錶盤下半部份閃閃生輝，精準程度達到122年先需要調校一次。另一重點逆跳日曆retrograde date置於錶盤上半部，黑色氧化處理嘅劍形指針隨日期向前移動，每逢月尾，逆跳系統將指針帶回 「1」 之位置，周而復始。Patrimony系列本身亦有一款雙逆跳之retrograde day-date，但新作則以月相取代逆跳星期功能。另一改動為月相嘅調較方式，腕錶將調較操作歸於錶冠，1^st Position 為錶款上鍊、2^nd Position調較月相顯示、3^rd Position設置時間，新江詩丹頓2460 R31L自動上鏈機芯確實為用家帶來極致嘅方便。