講起專業潛水錶，好多錶迷都會諗起寶珀 (Blancpain) 嘅五十噚系列。1950年代，Blancpain聯同法國海軍一同設計咗一款防水深度達300呎 (五十噚) 嘅潛水腕錶，喺低光、黑暗嘅環境之中能夠清晰閱讀，可旋轉外錶圈方便計算氧氣量，呢個就係Fifty Fathoms系列嘅開瑞；1956年，錶廠再推出直徑比較細嘅Bathyscaphe，比較適日常配載，但亦具備專業級潛水功能。

MenClub都曾經介紹過今年推出嘅「五十噚」新品，藍色嘅陶瓷錶圈加液態金屬刻度，令人印象深刻；趁住年底，Blancpain再推一隻Fifty Fathoms Bathyscaphe Flyback Chronograph Ocean Commitment II，新版「心繫海洋」飛返計時碼錶，同樣係搭配全藍嘅陶瓷錶圈，限量250隻。

同2014年嗰次一樣，今年嘅「Ocean Commitment」入面，Blancpain同樣承諾每賣一隻錶就會捐1000歐元出去，總數25萬歐元將會用以支持海洋環保事業。2016版嘅重點當然係藍色嘅陶瓷錶圈啦，大家經常見到黑、白、灰色陶瓷，而少見其他色係因為同時保持顏色一致性同持久性係需要極高技術，加熱程序之先必需保證物料嘅純淨度，而製成品係無得後期修正，所以做得唔好，好易會前功盡廢。

好Technical地講，Blancpain用咗兩項特殊技術去創造咁靚嘅藍色陶瓷圈；一，對陶瓷粉末通過壓實工藝以完成塑形；二，通過注射充模技術將陶瓷粒嵌入模具當中。雖然無辦法做到完全相同嘅顏色，但Blancpain就成功將一種藍色精準地控制喺固定範圍之中，而佢地就稱呢隻深邃嘅Ocean Blue為「寶珀藍」。

新版Ocean Commitment搭載新限量版F385機芯，內置導柱輪計時裝置，振頻達到每小時36,000次，做到十分之一秒計時。其飛返功能亦係重點之一，普通Flyback操作需要3下先可以重新計時，一 : 停止，二 : 歸零，三: Restart，但Blancpain呢隻就只需要按下4點鐘位置嘅按鈕，就可以做到歸零同重啟，大大簡化咗整個過程。