MenClub一向都歡迎巴打們PM吹水，尤其最近收好多關於Scotch Whisky嘅問題，咁不如整個蘇格蘭威士忌熱門Q&A啦。頭10條問題都會入門級一啲，俾威士忌新手少少初步認識；如果你已經係資深飲家，有專家級問題想考吓我地都得架，話哂我地背後有成個專業酒界團隊朋友 (即係酒肉朋友們)，總有一個會幫到你！OK，事不宜遲，你想唔想知，我都會講架啦，關於蘇格蘭威士忌的 10 個問題！

理論上，一枝存放得好嘅威士忌係永遠都唔會變壞 (都唔會變得更好味)。令威士忌走味嘅最大威脅必然係空氣，當你開咗枝酒，再套返好酒塞，存放於陰涼位置，一般嚟講一年半載都無問題。如果擺再得耐啲會點? 不如你問吓點解咁耐都未飲完枝酒啦！

2.Scotch通常係咩味道?

坦白講，蘇格蘭雖然唔算好大，但每間蒸餾廠，每個地區都有各自嘅特色同風格，有Single Malt有Blended，從輕盈優雅同重泥煤煙燻，變化多端任君選擇。要了解Scotch嘅主要風格，不妨從地區、蒸餾廠、木桶呢幾個重要元素去考慮。

3. Scotch同其他威士忌有咩分別?

個人認為，相比起美帝、加拿大嘅威士忌，一般嚟講蘇威都比較有層次同埋自然，印度較重口味，日威其實近似蘇威，畢竟其技術係來自蘇格蘭。另一個重要分別，蘇威、日威係叫Whisky，而美加等地則用Whiskey，好多人話無「e」會好飲啲，但呢啲嘢好主觀嘅。

4. Scotch喺咩時間飲最好?

我唔直接答你，睇個例子先 : 曾經出席過一個Whisky Pairing係Early Lunch時段；席間大家吹水問晨咁早飲威士忌係咪得架，跟住某資深釀酒大師就答 : 「Oh, I bet it’s night time somewhere in the world」，意思即係點? 鐘意飲嘅人自然會明白啦。

5. Scotch有幾多卡路里?

近年飲家們都比較關心嘅議題。Johnnie Walker都逐漸喺酒標上寫上營養資訊，相信其他大廠品牌喺未來幾年都會照做。如果一杯35ml，有50% ABV嘅Scotch係有約7~80KCAL，但真正高卡嘅係Mixer，綠茶、可樂，或者Cocktail入面嘅果汁等等，飲得多嘅朋友記得留意吓。

6. Scotch對身體有無正面作用?

適量飲酒其實唔衰得哂，唔少研究都指出威士忌其實有預防心臟病、中風、認知障礙、癌症等功用，全因威士忌比紅酒有更多嘅鞣花酸 (Ellagic Acid)，一種強勁嘅抗氧化劑。唔係話飲威有益健康，只係適量飲用嘅情況下，其實都有啲正面作用嘅。

7. Scotch係咪Gluten Free?

另一個熱門健康議題，好多人都開始注重自己嘅飲食係咪Gluten Free。而Scotch一般而言都可以話係Gluten Free嘅酒液，雖然原料大麥係Gluten Grain，但其蒸餾過程會順勢隔除埋嘅Gluten Proteins，所以答案係Yes！但如果你真係好驚，或者飲酒唔係太適合你。

8. Scotch個年份係點睇法?

Scotch Whisky好多時都有個年份喺樽身度，12、18、21、30等等，意思係枝酒所使用嘅原酒最Young嗰隻都有呢個年份。故此一枝12年可以係99%嘅30年老酒 + 一滴12年，咁佢就要寫12年架啦。而無年份酒其實至少都有3年，因為係Scotch嘅法例規定。

9. Scotch要飲Neat，Neat係咩意思?

Neat即係乜都咁加，就咁直飲；無冰、無Mixer就咁品嚐，好多時靚酒都係Neat飲，最原汁原味呀嘛。

10. Scotch係咪一定係蘇格蘭出?

咁就梗係啦！我知大家俾人Fake得多，瑞士雞翼、揚州炒飯，無一樣同個地方有關，但Scotch係名副其實嘅蘇格蘭威士忌。