馬爹利干邑，尤其係藍帶Cordon Bleu，都算係絕無僅有，可以由阿爺嗰輩飲到今日我都仲飲緊嘅酒。我地呢個年代，有屬於我地嘅烈酒潮流，細個我 (合法年齡) 都係飲威士忌先，仲要係唱K溝Mixer綠茶嗰種威士忌，而及後Single Malt大行其道，日威台威相繼掘起，講到尾都係威士忌做主角。不過，阿爸、阿爺嗰一輩，就必然係干邑做主導，Martell 300年、軒尼詩250年，干邑經過幾個世紀仍屹立不倒，總係有佢原因嘅。

雖然干邑品牌擁有光榮歷史同傳統，仲要隻隻酒都係經典作品，但唔代表佢地唔識求變創新。馬爹利就公佈咗喺來年1月1號，推出一隻全新火焰限量版藍帶，以頂級干邑原液，置於經過Chauffe Crocodile高溫加熱法處理嘅橡木桶之中，額外熟成多6個月，呢個方法係Martell首次應用，相信可以為大家飲慣飲熟嘅Cordon Bleu帶來新嘅衝擊！

Chauffe Crocodile，具體方法係將橡木桶內部以文火「烘烤」，令木香更為濃厚，再加上頂級「生命之水」，兩者來個酒、木交融，其香氣隨即帶有烘烤朱古力、烤杏仁等特別嘅味道，配合藍帶干邑本身帶有嘅蜜餞、香橙、肉桂、蜂蜜等甜味同微辣風味，令火焰版藍帶喺味蕾上嘅衝擊力、勁度更強，久久縈繞不散，使人印象深刻。

除此之外，為咗配合藍帶火焰限量版嘅推出，Martell特意搵咗倫敦調酒大師Clotilde Lataille合作，設計出一杯彰顯出橡木桶力量同埋熱力嘅招牌雞尾酒Intense Heat。不過，首次品嚐，當然要先以直飲為敬，清楚知道酒液嘅風格，再體驗佢其他變化都未遲。想試嘅巴打們，可以2017年1月1月號起喺香港機場、過關口岸等地方買到，暫時已知零售價為US$229美金。