唔知大家睇咗Rogue One未呢，話說「宇宙最強」嘅甄子丹就真係憑套電影打到上太空，但先要提醒大家，如果本身唔係星戰迷，記得要做足功課先好入場，否則精彩程度會大打折扣架。同樣係星戰迷嘅，仲有香港陀飛輪品牌Memorigin萬希泉同埋作曲、設計同樣出色嘅雷頌德，今次趁住Rogue One上映，佢地再同Lucasfilm合作，推出3隻星戰新品陀飛輪腕錶 : Darth Vader、Kyolo Ren同埋RD-D2！

George Lucas嘅世界入面，最有魅力嘅奸角一定係Darth Vader。由一代英雄嘅絕地武士，至被黑暗力量利用，到戴上面具之後，將內心正義之心完全封印，既充滿神秘感，且令Fans又愛又恨，而主導今次設計嘅Mark Lui就將呢份神秘感演繹於陀飛輪之上。漆黑嘅色調貫穿整隻陀飛輪錶，利用面罩口部，隱約露出陀飛輪嘅機芯零件，配以魅黑不鏽鋼錶帶，厚重嘅鎧甲入面，潛藏複雜嘅「芯」。

除咗主錶盤嘅設計之外，Mark都照顧咗星球大戰Fans們對於細緻部分嘅要求，所以個指針特別取材戰鬥機TIE Fighter，並以Darth Vader嘅紅色激光劍造型作分針，刺激大家的視覺神經，成隻錶型仔得嚟，亦將Darth Vader嘅人物形象塑造得活靈活現。

Mark嘅第2隻作品，就選材自Kylo Ren，一位Darth Vader嘅忠實擁躉，亦因此兩者感覺上亦相當近似；不過相較之下，Kylo Ren則有一種更陰沉嘅性格，著住斗篷外套，好似隱藏著一股巨大嘅潛能咁。Mark將Kylo Ren嘅面具刻劃於錶盤之上，仲特別為佢訂製咗尼龍錶帶，重塑斗篷外套嘅形象。而指針方面，同樣係使用咗TIE Fighter樣式做時針，分針則為Kyolo Ren嘅十字紅色激光劍。

最後一隻，一望就知係忠臣R2-D2啦。呢位圓桶形嘅維修及操作戰鬥機械人，喺星戰嘅地位絕不比上面兩位遜色。當R2-D2進入X-Wing Fighter嗰陣，會見到其半圓球體嘅頭部，而腕錶就係取材自R2-D2頂部嘅俯瞰圖作為錶盤，從藍色濾片之中滲透出內部嘅陀飛輪組件；3隻星戰作品之中，我最鐘意嘅反而係屬於好人角色嘅R2-D2，純綷以腕錶角度嚟講，藍白色嘅配搭已有先天優勢，而Memorigin特別選用較為耀眼嘅鱷魚皮錶帶，戴於手腕之上更顯光澤。

3款Memorigin星戰系列，各限量100隻，全部有Mark Lui嘅親筆簽名限量版證書，值得讚賞嘅仲有3款以太空艙為主題嘅錶盒；Darth Vader陀飛輪嘅錶盒以漆黑感籠罩，內外不同物料將黑色分層，好有霸氣；Kylo Ren則以 「The First Order」 旗幟紅黑為主題，全黑盒配搭紅色皮革內籠；而R2-D2陀飛輪貫徹採用藍白奪目色彩，銀白外盒襯托內部藍色的皮革，典雅亦不失星戰味！