唔知幾多錢噴射引擎咖啡機

文：MenClub 魏文青　　
POSTED ON 22 Dec 2016

你鍾唔鍾意飲咖啡？有冇興趣喺屋企添返部咖啡機？但你又有冇覺得市面上一般幾千銀一部嘅咖啡機襯唔起你呢個咁識得享受生活嘅男人？雖然我唔知你啲自信喺邊到黎，但如果你真係咁諗，咁睇黎你需要嘅就係以下呢部「噴射引擎咖啡機」啦！

呢部「噴射引擎咖啡機」係由Super Veloce出嘅，，真名叫TURBOJET 100。Super Veloce之前都有出過一部V8引擎樣嘅咖啡機，而今次好明顯就係用咗飛機嘅噴射引擎做設計主題，連物料都用上航空級別嘅6061-T6鋁合金、316Ti不銹鋼等金屬。所以雖然唔算好大部(78 x 33.2 x 45.5 cm)，但就有成28KG重。使用時只要將成個噴射引擎拉開，再加入水同咖啡粉(或者茶葉)，收返個引擎，再撳掣就得。

雖然目前就未公佈價錢，但睇返之前隻V8引擎咖啡機都要成十萬銀港紙，呢隻TURBOJET 100都唔慌平得去邊。但如果比起隻V8，我就覺得呢隻TURBOJET 100就比較似係「將一部咖啡機收咗入個噴射引擎殼入面」多過一隻「噴射引擎樣嘅咖啡機」啦。