每朝早起身嘅時候，唔飲杯咖啡，食少少嘢，個人都總係好似Run得唔順咁；葡萄酒亦都係一樣，喺木桶沉睡多年然後裝瓶，一時之間未必去到最佳狀態。要令枝Wine發揮應有嘅酒香同風味，需要增加酒液同空氣嘅接觸，尤其面對啲比較厚身嘅作品，或者陳年佳釀，醒酒呢一步就來得更重要！

經醒酒嘅葡萄酒會有更柔順嘅單寧，散發比原先更明顯嘅花香、果香，而整枝酒嘅風味亦會隨之變化。好多飲家都會問，到底醒酒呢個步驟應該醒幾耐? 答案 : it depends，要視乎作品嘅風格同年歲，一般而言從20分鐘到3-5個鐘都有；如果係厚身少少、味道豐盈啲嘅酒，多數都會用一至兩個鐘做醒酒，而年份久遠嘅陳年佳釀，則約莫需要兩小時以上。

Decanting仲有另外兩個重要功能，第一係過濾酒中嘅沉澱物或雜質，有時候因為木塞太乾，開酒嗰陣可能會有木碎跌入酒中，醒酒嗰時可以加上過濾器，隔阻唔需要嘅物質，而隔走自然產生嘅酒中沉澱物，都係Decanting其中一個重要目的。另一功能 : 型，其實Decanting係一個非常專業而優雅嘅動作，一位男士識得俐落地醒酒，絕對係型到核爆嘅表現。

如果你想將醒酒呢件事做得更靚，你需要一個Decanter，從Standard Glass到水晶玻璃，有平有貴，絕大部份都設計優美；眾多選擇之中，識飲之人應該觀察Decanter嘅形狀，睇下佢提供空氣接觸嘅範圍有幾廣，例如Swan同Standard嘅Decanter就有好大分別，一個適合俾Full-bodied嘅紅酒，好似Shiraz、Cabernet Sauvignon之類，而另一個則較適合喺Light至Med-bodied嘅作品上使用。

再次強調醒酒嘅作用係增加葡萄酒同空氣嘅接觸，為咗加速呢個過程，醒酒之時可以首先慢慢將瓶中酒，依隨Decanter嘅邊緣倒入去，又或者可以喺倒完之後，搖一搖佢，Youtube上面有好多專家示範片段，跟住做你都識話「其實唔難」啦。

Source : Wine Folly