泥煤度與PPM

威士忌係有個指標講你聽枝酒泥煤味有幾重，喺Ocotmore嘅樽身上面，你都係見到呢個資料 : ppm (Parts Per Million)。個數值愈高，代表枝酒泥煤味愈重，1 – 10係輕度，10 – 30係中度，而30 – 50就已經算係重泥煤味。叫得做世上泥煤味最重嘅威士忌，ppm又去到幾多? 答案係130 – 258!!以泥煤見稱嘅Laphroaig，或者Arbeg，泥煤度都係介乎於40-60之間，飲開嘅巴打應該想像到Octomore個泥煤度有幾誇張。

泥煤味來源

坊間有個說法，話Islay Whisky啲泥煤味係來自水源；但事實上啲水係唔太關事，將Peat味帶入威士忌嘅係佢地做烘烤嗰陣嘅原料。當大家回溯返歷史，會發現泥煤係艾拉島居民日常生活常用嘅原料，加上處處都見到泥煤田，呢種風味已經變成咗Islay標誌性嘅風土氣息。艾拉島嘅威士忌蒸餾廠仍然以泥煤做烘烤大麥或者橡木桶嘅燃料，啲Peaty香味就自自然然會滲入威士忌入面。

Octomore酒身數字

如果大家有試過Octomore，會見到酒身上面會寫住7.1、7.4呢啲數字，佢地其實隱含咗好多訊息。2002年第一支Octomore係寫住「1.1」，前面個1係代表第幾年，小數點後嘅數字則代表不同系列；

「.1」即5年熟成，用蘇格蘭大麥加美國波本桶，係每年都有嘅標準版

「.2」係玩桶系列，迄今出過波本桶搭Petrus紅酒桶、Yquem貴腐甜酒桶、Cognac桶同埋Syrah紅酒桶4個版本。

「.3」就係用酒廠附近Octomore農場嘅單一農場大麥製成。而Ocotmore呢個名都係來自呢個農場，可以話係呢個系列嘅起源。

「.4」上年嘅新嘗試，用Virgin Oak處女桶玩超重泥煤味嘅話題性作品。

泥煤味與平衡性

雖然話Octomore係世上泥煤味最重嘅作品，但單靠一味加重啲正露丸味，又點會贏到飲家們嘅歡心呢?! 上面講咗Octomore其實不斷嘗試用各種風味撞埋泥煤味度，而佢地每次都贏得極佳嘅口碑，主要原因係Ocotmore除咗泥煤之外，仲表現出好豐富、好複雜嘅酒香，例如橡木、咖啡、雲尼拿、果香等等。另外最令人印象深刻嘅，必然係極其順滑嘅酒體，一飲入口，猶如絲絨輕撫，一隻咁重口味嘅威士忌，竟然有咁溫柔嘅一面，怪唔得啲人叫佢做「iron fist in a velvet glove」。

Octomore背後的大師

Jim McEwan

Adam Hannett

首次接觸Ocotmore，必然係被佢背後嘅釀酒大師Jim McEwan吸引，呢位威士忌業界嘅傳奇人物自從2000年加入Bruichladdich復廠之後，帶領酒廠贏盡國際大小獎項，將酒廠泥煤與非泥煤嘅個性都發揮得淋漓盡致。不過，Jim McEwan喺2015年7月就退咗休架啦，而接佢班嘅新任首席蒸餾師Adam Hannett就係Jim嘅高徒。得三十幾歲嘅Adam，第一款處女作就係Ocotmore 7.4 Virgin Oak，年紀輕輕已經具備超凡功力，往後嘅日子真係特別令人期待。