本土嘅嘢，唔係你話禁就禁得住，之前Zelos Hammerhead玩咗隻香港獅子山特別版，隕石面有Hong Kong字樣，而反轉錶底則見到獅子山外貌輪廓，仲有「The Place We Call Home」字樣。百年靈Breitling新出嗰隻Avenger II深潛海狼黑鋼腕錶，同樣係屬於香港嘅特別版，錶底刻有「香港」兩隻繁體中文字。一次又一次外國腕錶品牌吹奏香港，令我諗返起「鬼佬都撐廣東話」幅圖，我地身為活在香港嘅香港人，真係感受特別深刻。

講返隻錶先，BreitlingAvenger II Seawolf Blacksteel並唔係飛機錶，而係一隻潛水錶嚟。腕錶防水性能深達到3,000米，45mm超堅固黑鋼錶殼配備可平衡錶殼內外壓力差嘅安全減壓閥。潛水嗰陣，用家就算戴住手套都可以輕易操作腕錶嘅單向棘輪式旋轉錶圈，至於雙密封墊旋入式錶冠兩側，亦都配有加固防護裝置，確保防滑。腕錶仲有夜光塗層嘅大Size指針、時標，以及經雙面防眩處理嘅厚實拱形藍寶石水晶鏡面，潛水錶應有items，all checked!

45mm緞紋磨砂精鋼錶殼，加埋鑲刻錶圈，高強度碳化處理嘅黑色外觀，同黃色指針、刻度形成強烈色彩對比。腕錶搭載百年靈17型自動上鏈機芯，具每小時28,800次嘅高振頻，有COSC瑞士官方天文台認證。

香港限量版喺錶底刻咗「香港」兩字，售價從HK$41,600 – 46,710，視乎你揀邊隻錶扣同錶帶。不過叫得Limited Edition，已經預咗佢唔係多，但只限百年靈港澳專門店發售嘅香港版Avenger II Seawolf Blacksteel，竟然只有50隻! 想支持本土，其實都唔係咁易架。