{ SKIP }
文:MenClub John Chan  圖:互聯網
POSTED ON 10 Nov 2015
純粹個人觀感,我覺得真係冇乜必要喺香港養部SUV,呢種所謂「冇乜必要」就真係只從實際出發。如果你話我要型,我要有安全感,又或者,唔揸部有番咁上下大size嘅車出街,我會覺得好寒酸的話,咁就無得講啦。

喺香港,有部Corolla、Golf呢類車已「夠晒皮」,真係鍾意玩車,買部Golf GTI或Golf R,又或者求其一款Performace Turbo Hatch,已包你勁開心,兼久不久有機會去上駕駛改進課程,識到啲手車同個樣都
幾辣嘅女車神。

你話要坐多少少人,日本三大MPV、Noah、Serena、Stepwgn,任擇一,包無衰,無後悔。真係要大部啲,畀多些少,望望「四十幾萬」呢個價位:日本車值得考慮Odyssey,德國車必定要揀福士Sharan,我喺2011年於《車主》雜誌工作時,到德國試揸咗幾日,好Like。係唔係再玩得豪啲,「升呢」到豐田Alphard/Vellfire或日產Elgrand,睇你自己口味嘞。

數咗一大堆型號,部部都買得落手,倘若你都有七至八成認同上述觀點,真係冇理由會諗到要買Touareg。

但係,如果你要走兩邊,成日香港大陸,大陸香港,與Touareg相近尺碼嘅中大型SUV,就好大機會被列入你嘅「射程範圍」。你可能話:「我有架『佛』(豐田Alphard)乜都夠,我淨係行公路,唔諗SUV。」呢類講法我大概認同,但大陸嘅嘢,真係活到老,學到老,一入大陸,再唔可以淨用香港嗰套去應付,你試吓喺大陸遇正豪雨,路面積水,水深升高些少,褲浪即刻「涼一涼」,唔知你個「佛」保唔保到你。OK!麥兜托瀨,啲水去得快,成地泥,你個「佛」會唔會跣腳?
呢啲好明顯唔係「佛」嘅錯,係社會嘅錯。嬲都無用,學識自保,提高危機意識先係上策。最簡單,首先部車要有套真係應付到泥濘碎石嘅四驅系統,動力系統設計愈簡單愈好,咁自然吸氣引擎,V6、V8理應無得輸。「咁會好大咬喎!」搭火車囉,搭火車唔大咬。

睇VWHK畀傳媒嘅Touareg簡介,有一項幾有趣實用嘅服務,稱為「粵港通」救援服務,只要今年內登記出牌全新Touareg,可免費擁有為期三年的粵港
兩地救援服務。所謂「救」,包括咗路上緊急維修、拖車、維修零件遞送、維修車輛存放及運送、燃油遞送、電池充電、更換輪胎、接送乘客至指定目的地、的士車費補償、開鎖服務及高達2晚5星級酒店住宿。

呢類支援服務,就好似保心安油或白花油一樣,寧可千年不用,不可一時不備,有咩事,有人救,個心定好多。

其實,要寫新Touareg,可以用百零二百字概括,然後講完收工,因為部車好簡單,冇乜驚世駭俗嘅破天荒設計,一副3.6 V6自然吸氣引擎,加個8前速自動波箱,一套四驅系統,一個算幾舒服闊落嘅車廂,然後……完。

不過,仍然值得喺動力系統講多兩句,你覺得自己叻豬,喺MenClub facebook留comment:「喂!新Q7有2公升直四Turbo偈,Touareg冇理由又「一模一樣」啦!」我唔係福士肚裡條蟲,唔知真正原因。不過,廠方喺Turbo引擎橫行嘅年代,為Touareg配副non-turbo V6機器,實在值得深思,其中一個原因,好大機會要令長途行車(講緊係1000至2000公里,一去就三五七日嗰種),有更高嘅「安全系數」,尤其是要令用家喺啲維修配套(包括技工)相對冇咁先進嘅地區(唔一定係中國大陸,可能係南美或俄羅斯),更容易維修,更容易取得零件或可兼容嘅零件。

呢副3.6 V6引擎最大馬力280匹/6200rpm,峰值扭力36.7kgm/3000-4000rpm,喺靜止起動嘅第一刻,的確冇Turbo引擎SUV嗰種「搶住搶住」湧出去嘅起動表現,但只要郁車十秒八秒,部車有咗慣性衝力,再加速就好smooth好線性,呢啲都係自然吸氣引擎嘅特點。
我喺試車過程中,發現波箱嘅運作模式,好影響到Touareg嘅耗油,例如以D波喺北大嶼山公路一帶行車,只要車速達85km/h或以上,波箱已跳到7波,引擎以1400rpm左右運轉,但低轉扭力仍好豐富,實時嘅平均耗油數字,介乎15.6公升/每百公里至,與廠方測試嘅13.2公升/每百公里頗接近。呢副引擎動力最旺盛嘅段落,約喺3000rpm至4500rpm之間,5000rpm以上其實仲幾滑溜,但你好少,亦無必要將轉數推到咁高。

今次試車全部行柏油或鋪裝路,冇試四驅系統嘅越野行車模式,未知其底蘊,但試用過車上嘅車身離地距調校系統,最多可以增多300mm離地距,豪雨下贏面更大。電子懸掛設Sport、Normal同Comfort三級,整體嚟講,三個級別都無特別偏硬及偏軟,喺配搭275/45 R20輪胎情況下,Sport模式喺韌挺之中仍有一定柔軟度,而Comfort模式,亦無喺高速過線或駛過橋駁口時,出現明顯浮盪,咁樣set法,我好like。

車廂係唔係你心目中咁大,上落係唔係你覺得咁鬆動,真係要你落去陳列室坐吓feel吓,值得留意,今代後排座椅有電動摺合掣,企喺車尾上落貨,方便慳力好多。

Volkswagen Touareg V6規格

售價:$699,980

代理:VWHK www.vw.com.hk

車型:五門五座

體積:(長)4801mm x (闊 )1940mm x (高)1709mm

軸距:2893mm

引擎形式:3597c.c. V型6汽缸,缸內直噴,前置引擎

馬力:280匹/6200rpm

扭力:36.7kgm/3000-4000rpm

波箱:8前速自動,四輪驅動

懸掛:(前)麥花臣支柱;(後)多連桿

車重:2103kg

耗油:13.2km/L 

輪胎:275/45 R19

「買得Polo,好心你俾多些少買Golf 1.4(150匹)啦!」 我多事,加把咀「咁買得Golf 1.4,點解又唔添多啲買GTI或Golf R呀?」 好在,地球仲有好多小車fans,亦都有個叫Volkswagen嘅老招牌 繼續陪佢哋癲,推出好似Gol ...
autoreviews
【一公升Turbo當道】Volkswagen Polo 1.0 TSI
06 Nov 2017
「而家啲車唔靚」已經流傳於環球車迷口中約20年。 我唔敢話將近2018呢刻,全球車廠已覺悟前非,部部新車皆「靚女」,但近年,德國、日本都有唔少令人睇得舒服順眼,又獨具風格嘅新盤。 包括今次MenClub到德國試駕嘅V ...
autoreviews
【不用看藍天碧海】Volkswagen Arteon
03 Nov 2017