你有冇識得啲人，無論你同佢講任何話題、個話題本身有幾咁有趣、命題有幾咁浩瀚，佢都能夠喺三言兩語之間就將整個話題消滅得一乾二淨？呢啲人，我地稱之為「話題終結者」。

和「話題終結者」傾計可能好冇癮，但同另一種人傾計就好痛苦，呢種人就係啲口水佬。佢可能係喺呢行打滾左好多年都只係高你半格的老CF，開口埋口就係當年自己有幾咁捱得、幾咁抵得諗先做到今時今日咁嘅地位；佢又會好好心咁教你好多做事方法、做人道理，哪怕你根本就冇問過佢嘅意見。而更更更令人討厭嘅係佢成日都好似唔X使做，一講就死唔斷氣，前世未講過嘢咁。

面對呢啲人，你除左（喺個腦入面）起雙腳伸佢出窗之外，就係學識以下呢6種「有體面地」結束對話的方法！

1. 認同法

顧名意義，「認同法」就係無論對方講咩狗屎垃圾你都表示認同，而且他廢話越多，你就越要表示得更加認同。由點頭哈腰到最終極的整個人向前傾，有幾誇張就做到幾誇張，等對方知難而退。

2. 微笑法

一路微笑一路向對方逼近的方法，最好是維持皮笑肉不笑的僵硬表情逐步逼近。只要略加些少演技就可以有恐佈片中連環殺手的逼力，如果去到鼻貼鼻對方都仲係一步不退，可以選擇真係成為連環殺手。

3. 倒車法

呢招好簡單，就係當口水佬走黎同你講嘢，你就拉手掣入後波退車走。請善用辦公室的電腦椅，高階版可加入不同的退車音樂。

接住落黎呢幾招除左要有演技，還要有良好的身體協調，建議多在家中與老婆或老母對話時作練習。

4. 被拖走法

一面擺出對談話內容很感興趣的表情，但又扮到好似有人喺背後拉走你咁。

適合在夜闌人靜加班時用的招數，配合昏暗燈光效果更佳，農曆七月會有威力加成。

5. Popping 法

在對方一開始說話時就開始跳Popping，最後以Moon Walk離場。

事前請先熱身

6. 飛走去

咪就係飛走囉，冇啦！

事先聲明，呢啲招數真係唔係個個用得，大家後果自負呀下！