話咁快九月第一個星期就過左，唔知各位學生哥慣未呢？計我話放完暑假返學最麻煩嘅唔係要早起身要盛，而係一返到學啲老帥就硬係會搵到啲嘢黎捉你－頭髮遮眉、的水過半耳、甚至條褲太短（我好難得先有得高架阿Sir！）咩都出齊，有時真係好煩！

但原來點煩都煩唔過以下呢11條外國的奇特校規，你有冇諗過學校會規定你唔准有好朋友呀？

1. UGG雪靴

明明人地就係雪靴，香港就明明冇雪，但只要一到冬天，一街都係著呢對鞋出街嘅女人。而係外國呢對嘢更加同Starbucks咖啡杯(冇錯，係個杯)同白色iPhone並列為「白人女生的代表物」。而喺美國的賓夕凡尼亞州就有學校禁止學生著UGG返學，原因係擔心啲學生會收埋部電話喺入面偷運返學……

2. 最好朋友(Best Friends)

讀得書就一定會識返三五個老死，而其中就一定有一個係同你特別Friend。但喺英國，有數間學校就禁止學生擁有「最好的朋友」，原因係為左「顧及其他學生的感受」咁話！咁又唔見你禁止啲死嘢生到又高又靚仔！？你冇理過我感受！？

3. 用手語介紹自己

有學前教育機構學校禁止一位失聰的學童用手語介紹自己，因為呢位學童的名字用手語表達，望落會好似支槍。OK，咁我改做上面呢個啦。

4. 紅筆

除非你叫馬沙，如果唔係成間學校唯一可以用紅色筆嘅人就係老師們。但喺英國同澳洲就有學校禁止老師用紅筆改簿，因為覺得紅色太有對抗性喎。

5. 拖手

冇錯，喺美國田納西州無論你係老師定學生你都係唔可以同拖手嘅！田納西州早前通過左條法案，禁止老師與學生進行任何「有可能鼓勵學生嘗試性行為」的行為，由於定義太廣泛，所以唔好講攬攬鍚鍚，連拖手理論上都會中招。而如果一經證實老師有拖手，最嚴重嘅處罰係革職。咁唔怪得中國人成日話自己先係最自由嘅國家啦！

6. 波

因為其中一位家長被棒球打中後受到腦震盪，多倫多的一間學校於是禁止一切硬球（網球、棒球之類）出現在學校範圍。唔知佢地會唔會因為家長們受到心靈震盪而禁止伋波嘅出現呢？

7. 瀨屎褲

在美國有些學校禁止學生穿著瀨屎褲返學，他們指瀨屎褲係黑社會先會著！但計我話，要禁瀨屎褲嘅原因根本就關咩黑社會事，真正嘅原因係佢核突呀！

8. 支持關注乳癌的手帶

再一次係賓州(賓夕凡尼亞州)。今次佢地禁止學生們戴一條呼籲關注乳癌嘅手帶，原因條手帶上面寫著「I love Boobies(我愛奶奶)」。我諗發起呢條校規嘅應該係個平胸女人?

9. 烤芝士三文治

你睇下呢張相入塊烤芝士三文治幾咁性感，真係睇到我流哂口水！但在英國就有幼稚園因為烤芝士三文治入面冇菜而禁止學生帶返去做午餐……都算係為左均衡飲食嘅…好…我忍…

10. 父親節卡

在蘇格蘭有間小學禁止學生攜帶父親節卡返學，原因是為了顧慮冇老豆的學生感受。但諷刺嘅係母親節卡就不在此限。即係簡單啲講，呢間學校係覺得生仔一定要有老母，但就唔一定要老豆嘅。

11. 猿人進化T恤

呢個猿人進化圖相信大家都睇唔少，你諗唔諗到點解會有學校禁呢個圖案？答案係該間在密蘇里州的學校認為呢個圖案宣揚達爾文提出的進化論，換言之即係違反左聖經的教導……