|
TOP 10獨立
好多女人一拍拖就好似將自己嘅人生依附住男友咁，無時無刻都想對方陪住自己，又奪命追魂call又乜乜77，唔單只好似冇咗自己人生，仲霸佔埋男友嘅人生，令對方厭煩不特止，仲會覺得好大壓力冇晒自己空間咁。其實每個人都需要有點點屬於自己嘅生活，懂得享受自己人生嘅女人，先更值得男人欣賞。
TOP 9聰明
外在只可以吸引人，內在先可以留住人。如果一個靚女單有美貌但冇腦，除非只係想同佢玩玩下，得閒啪啪啪就算，如果唔係，對多陣都會覺得浪費自己時間，因為同對方根本無法溝通，講嘅都係膚淺話題，傾幾句就完。只有有腦嘅女人，先可以滔滔不絕同對方講未來、講時事、講興趣、講價值觀……講乜都唔會無聊，重點係同對方對話，唔會拉低你智商之餘仲可以令你學到更多。
TOP 8床事配合
愛呢樣嘢其實並無神聖到可以只靠神交，肉體上嘅契合都非常重要。如果兩人嘅性愛口味相當唔同，又唔互相配合，就算心靈再吻合，都難補身體嘅寂寞，只可以滿足單一條件嘅女朋友，已經唔算係理想女朋友。
TOP 7 有吸引力
呢種吸引力唔一定係性感。每個人嘅喜好都唔同，有人鍾意可愛型，有人鍾意知性美，有人鍾意女人味，但只要對方中自己口味，吸引到自己，就已經係最有魅力嘅女朋友。
TOP 6 尊重男友
每個人都係獨立個體，就算更親，都仲係兩個人。女人要男友尊重自己同時，都要識尊重男朋友，可以講笑，但唔可以過火落男朋友面；可以叫男友幫你，但唔可以當人阿四老奉去幫你。識得尊重及愛錫自己男友，男友先會更加疼錫女友。
TOP 5 畀對方自由
男人要嘅係女朋友，而唔係要多個媽媽，唔好成日覺得自己為對方好，所以先管佢呢樣嗰樣，捉得愈緊，只會走得愈快，要記住，女朋友可以畀意見男友，選擇權始終喺對方手上，而唔係夾硬去控制男友。
TOP 4 唔嘮叨
就算係女人都會怕人「哦」自己，更何況係更怕煩嘅男人？就算你幾關心對方都好，一句起兩句止就夠，唔需要好似阿媽咁係咁講係咁講，男朋友其實心裡都自有分寸，女朋友愈講佢只會愈唔想做。
TOP 3 同男友身邊嘅人好好相處
其實做磨心好辛苦，好多男人都覺得，女友係一時，家人同兄分係一世，就算女友真係唔喜歡男友嘅家人朋友，起碼出到去都要識做唔好畀面色人，要男友難做。
TOP 2 包容
好多女人拍拖前已經見到男友嘅缺點，希望拍拖後自己可以改變對方，其實係相當傻嘅想法，一來人並唔係咁容易可以改變，二來如果你真正愛佢，明知佢有某啲缺點，都會願意去包容佢。如果個缺點影響太大，接受唔到， 一早就唔應該中個頭埋去要起埋一齊。
TOP 1 成為男人嘅動力
生活已經夠挫人，而一個理想嘅女友並唔係要重複話你知，你人工有幾低，你個人有幾無用，而係會喺你身邊鼓勵你，支持你，令你可以為愛人變成更好嘅人，努力去為對方打拼。
|
